د ریاست الوزرا سیاسي مرستیال د خپلو لیدنو په دوام په کابل کې د اروپایي ټولنې له شارژدافیرې ورونیکا بوشکوویچ پوهار سره لیدلي او دواړو لورو په افغانستان کې د اروپایي ټولنې پر همکاريو او بشري مرستو خبرې کړې.
مولوي عبدالکبير په دې لیدنه کې د پراختیایي پروژو پلي کولو، د نشه يي توکو له منځه وړلو، د بدیل کښت ورکولو، کاري فرصتونو برابرولو او پر نشه يي توکو د روږدو کسانو په درملنې کې له افغانستان سره د اروپايي ټولنې د مرستو غوښتنه کړې.
نوموړي زياته کړې، سرپرست حکومت په یوازې ځان د نشه يي توکو پر وړاندې مبارزه کوي او په یادو برخو کې يې د نړیوالو مرستې مهمې دي.
د عبدالکبیر په خبره، سرپرست حکومت د افغانستان له خاورې نورو هېوادونو ته د ګواښ متوجې کېدو په اړه د نړيوالو اندېښنو ته رسېدنه کړې او په افغانستان کې وسله والو ډلو ته د فعاليت اجازې په نه ورکولو سره به د افغانستان خاوره د هېڅ هېواد پر ضد ونه کارول شي.
د اسلامي امارت د ویاند مرستیال حمدالله فطرت وايي: « محترم مولوي صاحب عبدالکبیر د نشه يي توکو د له منځه وړلو، د بدیل کښت، کاري فرصتونو، د روږدو کسانو د درملنې په برخو کې د اروپايي ټولنې د مرستو غوښتنه وکړه او په دې برخه کې یې نړیوالې مرستې مهمې وبللې. د ریاست الوزرا سیاسي مرستیال دغه راز د ځینو نړیوالو اندېښنو په ځواب کې وویل چې د افغانستان خاوره به د نورو هېوادونو په خلاف نه کارول کېږي او نه به په افغانستان کې کومې بهرنۍ ډلې ته د فعالیت کولو اجازه ورکړل شي.»
عبدالکبیر له نړۍ سره د اسلامي امارت اړیکې پیاوړې بولي او زیاتوي، په هېواد کې د یو شمېر بهرنیو سفارتونو د فعالیت ترڅنګ سرپرست حکومت په بهر کې۴۰ سیاسي استازولۍ په واک کې لري او په نږدې وخت کې به نور هېوادونه هم د افغانستان استازولۍ سرپرست حکومت ته وسپاري.
په ورته مهال، په دغه کتنه کې په کابل کې د اروپايي ټولنې شارژدافیرې هم د يادې ټولنې او افغانستان د اړيکو پر پياوړتيا ټينګار کړی.
د اسلامي امارت مرستیال ویاند زیاتوي: « محترم مولوي عبدالکبیر صاحب د اروپايي ټولنې له مرستو مننه وکړه او زیاته یې کړه چې اسلامي امارت د نړۍ له ټولو هېوادونو سره د مثبتو اړیکو غوښتونکی دی او د افغانستان د بیارغونې او اقتصادي ځان بساینې لپاره هڅې کوي. نوموړي د اسلامي امارت د بهرنیو اړیکو د پراختیا یادونه وکړه چې د ګڼو بهرنیو سفارتونو پر فعالیتونو سربېره، په بهر کې ۴۰ سیاسي استازولۍ لري او دا شمېر د لوړېدو په حال کې دی.»
د نړیوالو اړیکو کارپوهان د اړیکو پیاوړتیا او بشري مرستو په برخه کې دغه لیدنې اغېزناکې بولي او ټینګار کوي چې سرپرست حکومت باید د ګډو کټو په پام کې نیولو سره له ټولو اروپایي هېوادونو سره اړیکې پیاوړې کړي، ترڅو اروپایي هېوادونه له افغانستان سره خپلې اړیکې رسمي پرانیزي او په بېلابېلو برخو کې همکارۍ ته را وړاندي شي.
د نړیوالو اړیکو کارپوه نجیب الرحمن شمال وايي: « له اروپايي هېوادونو سره د افغانستان د اړیکو پراختیا کولی شي په افغانستان کې د سولې او ثبات د لا ټینګښت سبب شي. همدارنګه د بېوزلۍ او بېکارۍ کمولو په برخه کې هم د افغانستان خلکو ته ګټه رسوي.»
ځېنې نور بیا وايي، د نړیوالو مرستې باید پر بنسټیزو پروژو ولګول شي؛ ترڅو افغان وګړو ته د کار دایمي فرصتونه برابر او له تل پاتې عاید برخمن شي.
دوی وایي، که سرپرست حکومت له اروپایي هېوادونو سره د اړیکو پیاوړي کول غواړي، په خپل داخلي سیاست دې له سره غور وکړي؛ ترڅو د متقابل درناوي په رڼا کې تعامل ته زمینه برابره شي.
د سیاسي چارو کارپوه محمد سلیم پیګیر وايي: « هغه لیدنې چې له دوی سره کېږي، ښکاره خبره ده چې د افغانستان د خلکو پر ګټه تمامېږي.»
د سیاسي چارو کارپوه اسدالله ندیم وايي: « که چېرې طالبان غواړي چې له نړۍ سره اړیکې ولري، دیپلوماسي وکړي او پر رسمیت وپېژندل شي، باید خپله داخلي تګلاره په اساسي توګه بدله کړي او له هغې ایډیالوژۍ سره مخه ښه وکړي چې تروریستي او افراطي ګڼل کېږي. له دې پرته نړۍ پر دوی باور نه کوي او د دې مصیبت زیان د افغانستان خلکو ته رسېږي.»
د اسلامي امار د درېیو کالو په تېرېدو سره د هېڅ هېواد له لورې پر رسمیت نه دی پېژندل شوی، خو اروپایي ټولنې له دې مخکې ویلي وو چې له افغانانو سره به خپلو بشري مرستو ته دوام ورکوي او افغانان به په سخت اقتصادي ناورین کې یوازې نه پرېږدي.
