د سولې په اړه مشورتي لویه جرګه کې عبدالله عبدالله برخه نه اخلي.
نیویارک ټایمز راپور ورکړی چې د حکومت اجرایه مشر او د ولسمشر غني د ایتلاف غړي پّه دې جرګه کې ګډون نه کوي.
نږدې دوه اونۍ وروسته به کابل د سولې په اړه د لویې مشورتي جرګې کوربه وي. هغه جرګه چې وسلوالو طالبانو سره به د سولې په اړه حکومت ته د مشورې ترڅنګ سرې کرښې وټاکي.
اوس نیویارک ټایمز راپور ورکړی چې د حکومت اجرایه مشر عبدالله عبدالله او د ولسمشر غني د ایتلاف ځینې غړي به په جوړېډونکې لویه مشورتي جرګه کې له دې امله برخه وانه خلي چې باور کېږي موخه یې د ولسمشر کمپآین دی.
لامل یې اوسه پورې دا ښوول شوی چې ګڼي ولسمشر غني غواړي د جرګې له لارې د ځان لپاره کمپاین وکړي.
د ولسي جرګې ځینې غړي دا اندېښڼه پرځای بولي خو د تحلیل کوونکو باور بیا داده چې کار د جرګې د ناکامولو لپاره روان دی.
د نیویارک ټایمز د راپور یوه برخه کې داسې لیکل شوي (( د حکومت اجراییه رییس عبدالله عبدالله او د ولسمشر غني د ایتلاف غړي ګواښ کړی چې د سولې په تړاو د زرګونو مشرانو په مشورتي لویه جرګه کې به ګډون و نه کړي.
عبدالله عبدالله او نور سیاسیون د دې لپاره ولسمشر غني ننګوي چې په راتلونکو ولسمشریزو ټاکنو کې یې سیال دی او وېره لري چې ولسمشر غني به له راتلونکې مشورتي لویې جرګې څخه د ځان په ګټه کار واخلي.))
د ولسمشرۍ ټاکنو لپآره یو شمېر نورو نوماندانو خو وار له مخه جرګه کې خپل ګډون رد کړی دی.
په دې اړه یوازې تر اوسه پورې د سولې او اعتدال ټاکنیز ټکټ دریځ واضح دی چې جرګه کې برخه نه اخلي.
د اوس لپاره خو د جرګې موخه طالبانو سره د خبرو لپاره لار ښوول بلل شوې ولې اندېښنه داده چې حکومت یې تر شا سیاسي موخې لري او پّه دې سره ښایي پّه جرګه کې د حکومت موده وغځیږي.
لویه مشورتي جرګه کې پخوانیو وکیلانو ته هم بلنه نه ده ورکړل شوې او دغه راز د ولسمشرۍ نوماندانو ته هم له دې امله بلنه نه ده ورکړل شوې چې باور کېږي د جرګې په اجنډا کې ګوتې ونه وهي.
