د ملي مصالحې عالي شورا مشر عبدالله عبدالله وایي چې د طالبانو او افغان حکومت لخوا د درې ورځني اوربند په اعلان سره د بین الافغاني مذاکراتو د پیل لپاره زمینه برابره شوې ده.
عبدالله عبدالله نن د غرمې وړاندې یوې خبرې ناستې ته وویل چې هغه د مصالحې د عالي شورا د مشر په توګه نن رسما خپله دنده پیل کړي ده او د دغه شورا د بین الافغاني مذاکراتو پیل ته چمتو ده.
عبدالله عبدالله زیاته کړه چې د مذاکراتو د پیل څخه وړاندي د باور فضا رامنځته کولو لپاره اوربند ته اړتیا ده.
د مصالحې د شورا مشر په خپلو خبرو کې د افغان حکومت او طالبانو له لورې د بندیانو تبادلې په تړاو وویل چې د بندیانو د خلاصون لړۍ تر دې دمه ښه روانه ده او دا چاره ښه نیت څرګند وي.
د مصالحې عالي شورا مشر عبدالله عبدالله دغه راز وویل چې راتلونکې اونۍ به د دغې شورا تشکیل بشپړ شي او د شورا په جوړښت کې به د ټولو افغانانو استازولي په پام کې ونیول شي.
د مصالحې د شورا مشر دغه راز ټینګار وکړ چې د بندیانو د تبادلې دوام او د بین الافغاني خبرو پیل افغانانو لپاره ښه زیری دی او باید د مساعد شویو شرایطو څخه ګټه پورته شي.
عبدالله عبدالله په خپلو خبرو کې دا هم وویل چې د سولې په پروسه کې پرمختګ په دواړو خواو (افغان حکومت او طالبان) پورې اړه لري او د دواړو لورو وروستیو اقداماتو د خبرو اترو د پیل لپاره ښه شرایط برابر کړي دي.
