د ازموینو ملي ادارې سرپرست د ثور اتمې په مناسبت جوړو شویو مراسمو ته د خبرو پرمهال عصري زده کړو ته پر زیاتې پاملرنې ټینګار کړی.
حقاني د افغانانو تقوا او زړورتیا تر نورو ښه یاده کړې، خو وايي د عصري زده کړو په برخه کې د نورو هېوادونو په پرتله وروسته پاتې او کمزوري دي.
نوموړي همدا راز د تېرو ښکېلاکونو پرمهال د افغانانو مبارزه هم د نورو هېوادونو پرتله ځکه کمزورې بللې چې په خبره یې عصري وسایل يې نه درلودل.
حقاني زیاته کړې: « سیالي او مقابله په دوو شیانو روانه ده، یوه سیالي او مقابله په عصري علومو ده؛ څومره طاقتونه چې زموږ هېواد ته راغلي، دا په عصري علومو کې له نورو وړاندې وو. دغو خلکو د عصري علومو په نتیجه کې داسې وسایل جوړ کړي چې له افغانانو سره نه شته، افغانان له ځانه دفاع نه شي کولی. که انګرېزان وو، که روسان یا امریکایان دي، د عصري علومو په ډګر کې له نورو مخکې دي. دوی چې کوم عصري وسایل جوړ کړي، دا له مسلمانانو سره نه شته. که تاسو وګورئ مسلمانان په ټوله نړۍ کې مظلومانه وخت تېروي. علت دا دی چې موږ په عصري میدان کې کمزوري یو، زموږ وسایل د دې نه وو چې موږ د اشغالګرو دفاع وکړو، د خپل ولس ساتنه وکړو او د سرحدونو دفاع وکړو او د اشغالګرو مخه ونیسو.»
اخوا د اطلاعاتو او کلتور وزارت سرپرست بیا دغو مراسمو ته خبرو کې وايي، په افغانستان کې پردۍ عقیدې او نظریې بریا ته نه شي رسېدای.
خیرالله خیرخواه زياته کړې، لا هم ځینې کسان د پردیو نظریو د پلي کولو هڅې کوي؛ خو په خبره یې دا کوښښونه یې یوه ناکامه تجربه او بې ځایه هڅې دي.
د خیرخوا په خبره، د تېرو نظامونو او چارواکو د پرځېدو لامل قوم پالنه، ژب پالنه، قدرت طلبي او تنظیم پرستي وه، خو د اسلامي امارت چارواکي باید له دغو کړنو ځان او ملت دواړه وساتي.
