د بهرنیو چارو وزارت سیاسي معين شېر محمد عباس ستانکزي د پخوانې شوروي اتحاد ځواکونو د وتلو ۳۶مې کلیزې په مناسبت په لوګر کې يوې غونډې ته ويلي، د ډیورنډ فرضي کرښه د انګرېزانو له لوري پر افغانستان تپل شوې او هېچا ته د منلو وړ نه ده.
نوموړي د ډيورنډ کرښې پورې غاړه د پاکستان تر کنټرول لاندې قبايلي سيمو او خيبرپښتونخوا ته په اشارې سره زياته کړې، چې اوسهمال د افغانستان نيمه جعرافيه د فرضي کرښې هغې غاړې ته پرته ده او هېڅکله به د افغانستان حکومت ياده فرضي کرښه پر رسميت ونه پېژني.
خو د ستانکزي دې څرګندونو پاکستان قهرولی او بهرنيو چارو وزارت يې د نوموړي څرګندونو ته په غبرګون کې اعلاميه خپره کړې.
په اعلاميه کې د ستانکزي څرګندونې خیالي او خپلسرې ادعا بلل شوې او په کې راغلي چې نوموړی نه شي کولی د پولو په اړه نړيوال قوانين او تاریخ بدل کړي.
د اعلامیې یوه برخه: « د پولي په اړه به د افغانانو خیالي او خپلسرې دعوې هېڅ وخت د قانون، جغرافیې او تاریخ حقيقت بدل نه کړي.»
د سیاسي چارو کارپوهان د پاکستان بهرنيو چارو وزارت دا اعلاميه د ډېورنډ فرضي کرښې رسميت په اړه د کاذبې ادعا هڅه بولي او وايي، د کرښې دواړو خواوو مېشتو قومونو ارادې او د قضيې حقوقي بڼې ته په کتو نه شي کولی، چې پاکستان يادې کرښې ته د رسمي پولې حېثيت ورکړي.
د سیاسي چارو کارپوه توریالي ځاځي وايي: « پاکستان دې دغه خوب او خیال له ځانه سره ګور ته یوسي، دا د افغانستان خاوره ده او باید افغانستان ته وسپارل شي.
ځینې نور هم د شېر محمد عباس ستانکزي له څرګندونو په هرکلي او ملاتړ سره وایي، چې افغان ولس او حکومت به هېڅکله پاکستان ته دا اجازه ورنه کړي، چې فرضي کرښه پر رسمي پوله بدله کړي.
دغه راز دوی وايي، دا د پاکستان لپاره تریخ حقیقت دی چې اوس هم د افغانستان خاوره او جغرافیه د فرضي کرښې هغې غاړې ته پرته ده او په خبره يې ازادول یې حتمي دي.
د سیاسي چارو کارپوه معین ګل څمکنی وايي: « دا یو پخوانی حقیقت دی او د انګلیسانو له وخته راپاتې یو مېراث دی، د دې لپاره باید ولسونه او حکومتونه تصمیم ونیسي، ځکه ترڅو به دا مسله همداسې پاتې وي؛ نو ښه به دا وي چې دا موضوع نوره خلاصه شي.»
دا په داسې حال کې ده چې واک ته د اسلامي امارت له رسېدو سره د پاکستان له لوري پر ډيورنډ فرضي کرښې لګېدلي سیمونه د يادې کرښې په ځينو نقطو کې له منځه يووړل شول.
د کرښې دواړو خواوو اوسېدونکو د تل په څېر ادعا کوي، چې ياده کرښه رسمي نه ده او هېڅ حکومت دا حق نه لري، چې د واحد قوم ترمنځ د بېلتون کرښې رامنځته کړي.
