د پاکستان پخوانی لومړی وزیر شاهد خاقان عباسي وايي، له بهرنیو هېوادونو سره په اړیکو کې د ایالتي چارواکو مداخله کولی شي حساس مسایل د حل پر ځای نور هم پېچلي کړي.
عباسي په دېره اسماعیل خان کې دغه څرګندونې د خيبرپښتونخوا د اعلی وزير علي امين ګنډاپور هغو هڅو ته په غبرګون کې کړې چې غواړي د افغانستان له سرپرست حکومت سره د مذاکراتو لپاره کابل ته جرګه ولېږي.
عباسي ټینګار کړی چې بهرنی سياست باید تل د دولت له کچې ترسره شي او که نه پایلې به یې ناوړه وي.
عباسي زیاته کړې: « دا د فډرالي حکومت موضوع ده، نه د صوبو او ایالتونو. له هېوادونو سره په اړیکو کې د ایالتي چارواکو مداخله کولی شي حساس مسایل د حل پر ځای نور هم پېچلي کړي.»
عباسي همدا راز د پاکستان اوسنی وضعیت د اندېښنې وړ بللی او ویلي یې دي چې دغه هېواد له اقتصادي، سیاسي او امنیتي کړکېچونو سره مخ دی او د حل یوازینۍ لاره یې د ډیموکراټیک نظام دوام دی.
عباسي زیاتوي: « د پاکستان اوسنی وضعیت د اندېښنې وړ دی. دا هېواد له اقتصادي، سیاسي او امنیتي کړکېچونو سره مخ دی او د حل یوازینۍ لاره یې د ډیموکراتیک نظام دوام او سیاسي ثبات دی.»
نوموړی همدا راز ټینګار کړی چې د حکومت په څېر اپوزیسیون هم په تېره یوه کال کې وېشل شوی او تر هغو چې اپوزیسیون متحد نه وي، هېڅ مانا لرونکی سیاسي تحرک نه شي رامنځته کېدای.
په همدې حال کې د سیاسي چارو شنونکي له نورو هېوادونو او په ځانګړې توګه افغانستان سره د پاکستان بهرنیو اړیکو ته په پام سره وایي، دغه هېواد په خپلو پرېکړو کې خپلواک نه دی او بهرنۍ ډیپلوماسي یې له لاسوهنو خالي نه ده.
د سیاسي چارو شنونکی زلمی افغانیار وايي: « هر هغه حاکمیت چې د خپلو خلکو غږ وا نه وري، ښکاره خبره ده چې ستونزو سره به مخ کېږي. دا چې د پاکستان حکومت اوس له خپلو خلکو سره په تقابل کې دی او خلک یې له اسلامي شریعت سره سمه حکومتداري غواړي، خو له بده مرغه د پاکستان حکومت د امریکا په ملتیا د خپل ولس پر وړاندې خصمانه پروګرامونه لري؛ نو ښکاره خبره ده چې ستونزو سره به مخ کېږي. زه هیله لرم خپلې ستونزې په خپله حل کړي او د نیوکو ګوته یې د افغانستان په خوا نه وي.»
د پاکستان پخوانی لومړی وزیر په داسې حال کې له نورو هېوادونو سره په اړیکو کې د ایالتي چارواکو د لاسوهنې مخالفت کوي چې کابل ته د علي امین ګنډاپور له لوري د جرګې لېږلو احتمال په پاکستان کې په دولتي کچه په يوه جنجالي ستونزه بدل شوی.
ګنډاپور لاهم پر خپل دريځ ولاړ دی او د خيبرپښتونخوا په شمول په قبايلي سيمو کې د ناامنیو مخنيوی له کابل سره په مذاکراتو کې نغښتی بولي.
