د پاکستان پوځ لوی درستيز عاصم منیر د دې هېواد د پوځي چارواکو په یوې ناسته کې ادعا کړې، چې د پاکستان ضد سلهوالې ډلې د ډیورنډ فرضي کرښې دا غاړه فعالیت کوي.
د پاکستان پوځ د عامه اړیکو دفتر د نوموړي له قوله لیکلي او ادعا یې کړې، چې ګواکې دغه نیابتي وسلهوالې ډلې په افغانستان کې فعالیت کوي او له هغه ځایه په پاکستان کې دننه د دې هېواد اقتصادي امنیت ګواښي.
د پاکستان لوی درستیز په مشخص ډول له چین سره د دې هېواد د ګډې اقتصادي پروژې سي پېک نوم یاد کړی او زيات کړې يې ده، چې دغه وسلهوالې ډلې یې د عملي کېدو پر وړاندې خنډونه جوړوي.
هغه زیاته کړې:« په دې فورم کې پر دې خبرې وشوې، چې وسلهوالې ډلې څنګه په افغانستان کې فعالیت کوي او له هغه ځایه سیمهییز او نړیوال امنیت ګواښي؟ د دې ترڅنګ دغه نیابتي ډلې د پاکستان او د دې هېواد د اقتصادي ګټو په ځانګړي ډول د چین او پاکستان اقتصادي دهليزپر ضد فعالیت کوي.»
اسلامي امارت بيا د پاکستان دغه لوړپوړي پوځي چارواکي تورونه په کلکه ردوي او وايي، اجازه نه ورکوي چې د افغانستان خاوره د نورو هېوادونو پر ضد وکارېږي.
د اسلامي امارت ویاند ذبیح الله مجاهد وايي:« د بل هېواد په وړاندې جبهه نه نیسو، نه هم چاته اجازه ورکوو چې د افغانستان خاوره د چا پر وړاندې استعمال شي. خو متاسفانه پاکستان پرله پیسې تورونه پورې کوي او د خپلو مسوولیتونو پړه پر افغانستان اچوي.»
د دې ترڅنګ د افغانستان حکومت ته نږدې المرصاد رسنۍ د داعش اړوند د هغو دوو تاجکستاني اتباعو ویډیو خپره کړې، چې په کې نیول شوي کسان پخپله اعتراف کوي او وايي، غوښتل یې پاکستان ته لاړ شي او په کویټه کې له پوځي زدهکړو وروسته په افغانستان کې ترهګریز بریدونه ترسره کړي.
د سیاسي چارو شنونکي هم د پاکستان دغه تورونه غلط استدلال او د نه منلو وړ ګڼي.
دوی وايي، پاکستان پخپله د ترهګرو روزنې او پالنې ځای پاتې شوی او اوس غواړي د ملامتۍ دغه بار له خپلو اوږو ښکته کړي.
د سیاسي چارو شنونکی ادریس ځاځی وايي:« دا د منلو وړ نه ده، دا له منطق او استدلال هم لرې خبره ده، پاکستان تل د ترهګرو ځای پاتې شوی، اوس پاکستان د سي پېک پروژې ناکام والي او خپل اقتصادي رکود لپاره پلمې لټوي، ترڅو څنګه وکولی شي چې د حکومت دغه نیمګړتیاوې او د حکومت دغه ناکامي، دغه پړه پر بل حکومت واچوي.»
پاکستان له دې وړاندې هم په ځلونو ورته تورونه پوړې کړي، چې د افغانستان حکومت په ګډون پخپله تحریک طالبان پاکستان ډلې هم په کلکه رد کړي.
ټي.ټي.پي د روان زېږدیز کال د مارچ پر اتمه د ملګرو ملتونو په امنیت شورا کې د پاکستان استازي منیر اکرم ورته څرګندونو ته د اعلامیې له لارې غبرګون کې پر دې ټینګار کړی، چې یاده ډله خپل ټول فعالیتونو د پاکستان تر کنټرول لاندې سيمو کې تنظیموي او د افغانستان په ګډوڼ د هېڅ بل هېواد له خاورې ګټې اخیستنې ته اړتیا نه لري.
