د راپورونو له مخې، د ډېورنډ فرضي کرښې په اوږدو کې د افغانستان او پاکستاني ځواکونو ترمنځ وروستيو جنجالونو له امله د کابل او اسلام اباد اړيکې تر بل هر وخت زیاتې پیکه شوې ښکاري او له امله یې پر افغانستان د پاکستان نيوکې بيا ځل پيل شوې دي.
تازه د پاکستان د پوځ لوی درستیز عاصم منیر په خیبر پښتونخوا کې له سیاسونو سره د لیدنې پر مهال ويلي، له کابل سره یې یوازېنۍ ستونزه هلته د هغو وسله والو موجودیت دی چې د پاکستان ضد عمل کوي.
د پاکستان د پوځ لوی درستيز زیاته کړې: « افغانستان يو ورور ګاونډی او مسلمان هېواد دی. يوازېنۍ مساله هلته د وسله والو موجوديت او له ډېورنډ کرښې په پاکستان کې د ترهګرۍ خورېدل دي. دا ستونزه به تر هغې پر خپل ځای وي چې دوی دغه مساله حل کړې نه وي.»
له دې وړاندې هم د پاکستان لومړي وزیر او د بهرنیو چارو وزارت کې مهمو چارواکو په افغانستان کې د پاکستان ضد عناصرو د موجوديت ادعا کړې وه، خو د اسلامي امارت سرپرست حکومت دا ادعاوې بې اساسه بولي.
که څه هم سرپرست حکومت د عاصم منير د تازه څرګندونو په اړه څه نه دي ويلي، خو د پوځي چارو شنونکي وايي، پاکستان د خپل امنيت ټينګولو د اصلي مسووليت پر ځای، په ورته ادعاوو ځان غولوي.
د پوځي چارو شنونکی توریالی ځاځی وايي: « د پاکستاني چارواکو هره خبره د افغانستان لپاره زهر مطلق ده؛ په ځانګړې توګه د دې عاصم منیر خبرې. همدا څه موده وړاندې یې پر افغانستان بمبار ونه کړ، د طالبان ویاند او سرپرست وزیر څو ځلې غږونه ونه کړل چې زموږ له خوا د نړۍ هېڅ هېواد او په ځانګړې توګه ګاونډیانو ته هېڅ ډول ګواښ نه شته. موږ باید په دې خبرو خپل وخت ضايع نه کړو.»
ځينې نور بیا پاکستان پر لوړه کچه له سياسي او اقتصادي بې ثباتۍ سره مخ يادوي او په باور يې په ورته ادعاوو سره د افغانستان ناسم انځور د وړاندې کولو لپاره خپله بي ثباتي توجيه کوي.
د سیاسي چارو شنونکی شهسوار سنګروال وايي: « دا درې ټکي ډېر مهم دي؛ یو دا چې دوی غواړي بیا په پښتنو سیمو کې عملیات وکړي، دویم دا چې د ټي.ټي.پي پړه پر افغانستان واچوي او افغانستان کې هغه نړیوال سیاسي باور زیانمن کړي چې اوس موجود دی، دوی ځکه دا خبرې کوي.»
د نړيوالو اړیکو شنونکی واحد فقیري وايي: « پاکستاني چارواکي په عمومي توګه هڅه کوي چې د افغانستان په اړه سختې خبرې وکړي او ځینې نورې هم نرمې. زه فکر کوم په عمومي توګه د افغانستان او پاکستان اړیکې به ژر ښې نه شي. د دې لوی لامل دا دی چې پاکستان له امنیتي ننګونو سره مخامخ دی.»
د پاکستان له خوا د ورته ادعاوو پر وړاندې، د اسلامي امارت سرپرست حکومت موده وړاندې ويلي وو چې په افغانستان کې د داعش له لوري ترسره کېدونکي بريدونه له هغو مرکزونو پلان کېږي چې د پاکستان تر کنټرول لاندې بلوچستان او خيبر پښتونخوا کې دغې ډلې ته جوړ شوې دي.
