د ایران بهرنیو چارو وزیر د امریکا بندیزونو ته د اقتصادي ترهګرۍ نوم ورکړ.
جواد ظریف اندونیزیايي سیال سره د لیدو پر مهال دا خبرې وکړې او و یې ویل چې اوس هم که امریکا اټومي تړون ته راستنه شي دوی مذاکراتو ته چمتو دي.
ظریف له اسلامي هیوادونو سره د دوه اړخیزو اړیکو د پراختیا په موخه څو ورځنی سفر پېل کړی و چې اندونیزیا یې وروستی هیواد و.
جواد ظریف له خپل اندونیزیايي سیال سره د لیدو پر مهال یو ځل بیا پر امریکا نیوکې وکړې. ظریف د امریکا له لوري پر دوی لګیدلو بندیزونو ته د سوداګریزې ترهګرۍ نوم ورکړ.
د ایران بهرنیو چارو وزیر، جواد ظریف ویلي، (( له بندیزونو لرې کیدل موږ ته غوره دي ځکه پر ایران د امریکا بندیزونه موږ ته سوداګریزه ترهګري ده. هغوی عام ولس په نښه کړی او ولسمشر ټرمپ څو ځل دې کار ته د جګړې نوم ورکړی دی.))
ظریف پر اروپا هم تور پورې کړ چې هیڅ یې په دې تړاو د خپلې برخې همکاري نه ده کړې.
هغه یو ځل بیا و ویل که امریکا بیرته اټومي تړون ته راستنه شي دوی چمتو دي چې مذاکرات او خبرې اترې وکړي.
ښاغلي ظریف ویلي، ((موږ څو ځل و ویل او بیا وایو چې په کومه شیبه امریکا بیرته تړون ته راستنه شوه موږ چمتو یو چې خبرې وکړو او هغه کومې ژمنتیاوې چې مو له اټومي تړون سره را کمې کړي هغه بیا پیل کړو.))
د ایران بهرنیو چارو وزیر له اندونیزیايي چارواکو هم وغوښتل چې پر نړیوالو غږ وکړي چې اټومي تړون پلی کړي.
اخوا یې په فلسطین کې د روان وضعیت هم مخالفت وکړ او د اسلامي هیوادونو یو والی یې تر هرڅه غوره وباله.
