د اسلامي امارت له خوا په طبي انسټېټېوټونو کې د ښځو او نجونو پر زده کړو د بندیز په اړه د غبرګونونو په دوام فرانسې، ناروې او د بې پولې ډاګټرانو ټولنې هم یاده پرېکړه غندلې او دغه ګام یې د بشري حقونو او په ځانګړي ډول د ښځو او نجونو د کار او تعلیم په برخه کې نه مننونکې پرېکړه بللې.
د فرانسې د بهرنیو چارو وزارت د یوې خبرپاڼې په خپرولو سره ویلي، د سرپرست حکومت له لوري دغه ګام غیرعادلانه او د منلو وړ نه دی.
خبرپاڼه کې له سرپرست حکومت غوښتنه شوې چې پر ښځو او نجونو ټول لګول شوې محدودیتونه لرې کړي.
د فرانسې د بهرنیو چارو وزارت د خبرپاڼې یوه برخه: « طالبان له بنسټیزو حقونو د ښځو د لرې کولو هڅو ته دوام ورکوي او پر هغوی د محدودیتونو داسې پالیسي عملي کوي چې موخه یې په ټولنه کې له کار او تعلیم د نیمايي نفوس حذفول دي. موږ له طالبانو غواړو چې خپلې پرېکړې بېرته واخلي او د افغان ښځو او نجونو ټول حقونه ورکړي.»
په ورته مهال، ناروې او په افغانستان کې د بې پولې ډاګټرانو ټولنې هم له طبي انسټېټېوټونو منع کول غندلي او دغه اقدام یې د افغانستان په تعلیمي او طبي برخه کې ننګونی خطر بللی.
د افغانستان لپاره د بې پولې ډاګټرانو ټولنې استازي مایکل لي پې ویلي: « له باسواده نجونو پرته متخصصې ډاګټرانې وجود نه لري. له دې سره به صحي سیستم له منځه لاړ شي. زموږ په فعالیتونو کې ۴۱ سلنه افغانې ډاګټرانې خدمت کوي چې له دې اقدام سره به صحي فعالیتونه سخت وځپل شي.»
د اسلامي همکاریو سازمان هم له طبي انسټیټیوټونو د نجونو منع کولو ته ژوره اندېښنه ښودلې او ویلي دي چې له دې سره به افغانستان کې روغتیايي بنسټونه سخت اغېزمن شی.
له دې وړاندې ملګرو ملتونو، اروپايي ټولنې، جرمني، د بشري حقونو د څار سازمان او د بښنې نړیوال سازمان په افغانستان کې په طبي انسټېټېوټونو کې د ښځو او نجونو پر تعلیم د لګول شوي بندیزپه اړه ژوره اندېښنه ښودلې او له سرپرست حکومت یې د یادې پرېکړې د لغو کولوغوښتنه کړې.
د سرپرست حکومت چارواکو لا تراوسه په دې اړه هېڅ غبرګون نه دی ښودلی.
