طالبان وایي، له حکومت سره د سیاسي اړخ په توګه خبرې کوي.
د طالبانو ویاند ذبیح الله مجاهد ویلي، (( بین الافغاني مذاکرات به د ټولو سیاسي جهتونو له مشترک مذاکراتي ټیم سره وي، د کابل اداره به د حکومت په حیث نه بلکې د نورو سیاسي جهتونه په څیر یو جهت وي او دا کار به له امریکایانو سره د مهال ویش تر اعلان وروسته کیږي.))
له دې سره سرچینو ویلي، د افغانانو د ګډ ټيم او طالبانو ترمنځ خبرې ښايي په نږدې ورځو كې په ناروې هېواد كې ترسره شي.
د سولې لپاره د حکومت وزیر عبدالسلام رحیمي ویلي، افغان ۱۵ كسيز ټيم به د جمهوري اسلامي ټيم په نوم له طالبانو سره خبرې پیل کړي.
ښاغلي رحیمي ويلي، له طالبانو سره د مخامخ خبرو لپاره چمتووالى پيل شوى او دغه خبرې به تر راتلونکو دوو اونيو پيل شي.
د سولې په چارو کې د دولت وزارت د یوې خبرپاڼې په خپرولو سره ویلي، له ښکېلو اړخونو سره یې د ۱۵ کسیز پلاوي په ټاکلو کار او مشورې پیل کړې او دا مهال د خبرې کوونکي پلاوي نوملړ په وروستي کېدو دی.
له دې سره سم، د افغان سولې لپاره د امریکا ځانګړي استازي زلمي خلیلزاد ویلي، د سولې بین الافغاني مذاکرات به د طالبانو او امریکا ترمنځ له هوکړې وروسته ترسره کېږي.
ښاغلي خلیلزاد پر ټوېټر لیکلي، د طالبانو خبرې به له یو داسې افغاني ټیم سره ترسره کېږي چې د حکومت، سیاسي احزابو، مدني ټولنې او د ښځو استازیتوب وکړی شي.
