طالبانو ته نږدې سرچینې وايي؛ د طالبانو مشرتابه له څو ورځو سلا مشورو وروسته سلا شوی، چې له امریکا سره د سولې تړون له لاسلیک سره سم عمومي اوربند ومني.
ددغو سرچېنو په خبره د شهاب الدین دلاور پر مشرۍ درې کسیز پلاوي په پاکستان کې له خپلو رهبرانو سره سلا مشورې پای ته رسولي او قطر ته ستانه شوي دي.
د سرچېنو له قوله ؛ طالب مشران په دې سلا شوي، چې له امریکا سره د سولې د تړون له لاسلیک سره همهاله لنډ مهالي عمومي اوربند ومني.
تر اوسه امریکايي چارواکو د طالبانو دغه دریځ ته غبرګون ندی ښودلی.
امریکا له طالبانو غوښتي وه، چې د سولې د تړون له لاسلیک لس ورځې مخکې باید اوربند وکړي.
افغان حکومت وايي، چې د افغانانو د خپلمنځي خبرو په لړ کې باید دوامداره اوربند وشي.
د ولسمشر د ویاند مرستیال دوا خان مینه پال تمه ښودلې، چې د امریکا او طالبانو تر منځ د سولې د تړون له لاسلیک وروسته باید د افغانانو خپلمنځي خبرې پیل شي، چې اوربند یې اساسي شرط دی.
له قطر څخه ځينې سرچینې وايي؛ د طالبانو او امریکايي پلاوي ترمنځ په وقفیې توګه خبرې روانې دي، چې د سولې د تړون لاسلیک لپاره زمینه برابره کړي.
