په قطر کې د افغان سولې بې پایلو خبرو وروسته، قطر، ترکیې او ملګرو ملتونو په ګډه د سولې خبرو برخلیک مالومولو لپاره ترکیې کې د یوې غونډې لپاره چمتووالی نیولی، خو طالبان د دغه کنفرانس په تړاو له سره غور کوي.
طالب ویاند ذبیح مجاهد وايي٬ د قطر او ترکیې ناستې په تړاو يې مشران له سره غور کوي او دا به ورسته مالومه شي چې څه ډول پرېکړه کوي.
طالب ویاند ذبیح الله مجاهد وایي: (( په دې ټوله پروسه باندې له سره غور روان دی وروسته به مالومه شي چې موږ څه ډول تصمیم نیسو.))
له بلې خوا، په قطر کې د افغان دولت مرکچي پلاوی وايي، دوحه کې خبرې په ټپه ولاړې دي او د ترکیې د ناستې برخلیک لپاره انتظار باسي.
یاد پلاوی وایي: (( تردې مهاله په قطر کې د افغان سولې په تړاو د طالبانو او حکومت ترمنځ خبرې په ټپه ولاړي دي، خو موږ د استانبول د ناستې د برخلیلک لپاره انتظار باسو.))
د ترکیې ناستې نېټه، د روانې اپرېل میاشتې ۲۴مه ټاکل شوې ده، کوربه هېواد، ملګرو ملتونو او افغان حکومت ورته چمتووالی نیولی، خو طالبانو له هغې وروسته چې د امریکا ولسمشر جو بايډن د امریکايي سرتېرو د وتلو نېټه وځنډوله، وویل، تر هغې چې بهرني ځواکونو په افغانستان کې شتون ولري، نو طالبان به په هغو ناستو کې چې د افغانستان په تړاو په کې پرېکړې کېږي، ګډون ونه کړي.
