طالبان: تور لست په اړه د امریکا نوی دریځ د دوحې له تړون سرغړونه ده 

د افغانستان اسلامي امارت له ادرسه رسنیو ته په لېږل شوې اعلامیه کې راغلي، د امریکا دفاع وزارت چارواکو دا خبره، چې ګنې د دوی  په کابینه کې ځینې مشران یا د حقاني کورنۍ د امریکا په تورو لیستونو کې دي او د دوی هدف دي، دا د دوحې له هوکړې ښکاره سرغړونه ده.

په اعلامیه کې راغلي، دا ډول دریځ د افغانستان او امریکا دواړو په ګټه نه دی.

وروسته له هغې، چې طالبانو خپله نوې کابینه اعلان کړه ور سره امریکا د ځینو کسانو د سوابقو په تړاو اندېښنه وښوده.

د اسلامي امارت اعلامیه کې دا هم راغلي، چې د حقانی کورنۍ د  اسلامي امارت برخه ده او هېڅ جلا نوم او تشکیلات نه لري.

امریکا حقاني شبکه تورنوي، چې کابل او ولایتونو کې یې د امریکایانو پر ضد پېچلي عملیات رهبري کړي، خو امارت وايي، حقاني کورنۍ د  امارت برخه ده او د دوحې تړون کې له کومې استثنا پرته ټول مسوولین له امریکا سره د تعامل برخه وه او باید د ملګرو ملتونو او د امریکا له تورو لیستونو ایستل شوي وای، چې اوس هم دا غوښتنه په خپل ځای ده.

په اعلامیه کې راغلي، اسلامي امارت د امریکا دا دریځ په کلکو ټکو ردوي او دا ډول څرګندونې د تېرو ناکامو تجربو تکرار او د امریکا په زیان دی.

سرچېنې له امریکا غوښتنه کړې، چې هر څه ژر دا ډول ناسم دریځ په ډیپلوماټیک راشه درشه بدل کړي.