پخوانی طالب چارواکی اکبر اغا وايي امریکا او طالبان به دا ځل په دوه مهمو مواردو هوکړه و کړي.
د خلاصون لارې شورا مشر اکبر اغا د زلمي خلیل زاد او طالبانو ترمنځ دا ځل ناسته د تیر پنځم پړاو بشپړوونکې بولي.
تحلیل دا دی چې د زلمي خلیلزاد په شپږم سفر کې باید د اوربند پریکړه وشي٫ ترڅو د سولې خبرو ته یوه لاره پرانستل شي.
د زلمي خلیلزاد په دې سفر کې پاکستان له بین الافغاني مذاکراتو خپل ملاتړ کړی چې راتلونکې هوکړه به په افغانستان کې سوله راولي.
زلمي خلیلزاد د خپل سفر په شپږم پړاو کې پاکستان ته لاړ چې وروسته به قطر ته سفر وکړي او هلته به د افغان سولې په تړاو له طالب چارواکو سره خبرې وکړي.
د خلاصون شورا مشر اکبر اغا وایي٬ د قطر په شپږم پړاو خبرو کې د خلیلزاد او طالبانو ترمنځ د بهرنیو ځواکونو په وتلو او له افغانستان نورو هیوادونو ته د تهدید د نشتون په تړاو باندې یو وروستی بحث کېږي.
اکبراغا وايي٬ طالبان لومړی غواړي بهرني ځواکونه ووځي او وروسته به طالبان د بین الافغاني خبرو میز ته اماده شي.
تحلیل کوونکي بیا د افغان حکومت او وسله والو طالبانو ترمنځ په اوربند باندې ټینګار کوي.
خو له قطر وړاندې زلمی خلیلزاد پاکستان تللی چې هلته یې د پاکستاني چارواکو ملاتړ د افغان سولې په تړاو تر لاسه کړی دی٬ چې په افغان سوله کې ښه رول لوبولی شي.
زلمي خلیلزاد داسې ویلي (( پاکستان د بین الافغاني مذاکراتو په اړه بيا خپل ملاتړ اعلان کړ او دا سولې پروسې په پرمختګ کې ښه رول لوبولی شي. په خبرو کې دا هم ويل شوي، چې راتلونکې هوکړه به افغانستان کې تل پاتې سولې او ثبات ته زمينه برابره کړي او افغانستان کې سوله به په نړيواله کچه همکارۍ او پراختيا ته زمينه برابره کړي.))
د افغانستان د سولې لپاره د امريکا ځانګړي استازي زلمي خليلزاد پر خپله ټویټرپاڼه ليکلي چې په کابل کې د غونډو نتايج به له اسلاماباد او دوحې سره شریک کړي چې څه ډول ژر تر ژره د بینالافغاني خبرو زمینه رامنځته کېدای شي.
