د فاریاب ولایتي شورا رییس طاهر رحماني او یو شمېر نورې ځايي سرچینې وايي چې د فاریاب المار ولسوالۍ نن د طالبانو په لاس سقوط شوه.
رحماني وايي، المار ولسوالۍ کې کابو ۶۰ سرتېري له څو ورځو راپدېخوا د طالبانو له لوري کلابند شوي وو چې نن د قومي مشرانو په منځګړیتوب له ولسوالۍ وتلي او ولسوالۍ د طالبانو لاس ته لوېدلې.
تېره ورځ د دغې ولسوالۍ امنیه قومندان امین الله پتنګ هم طالبانو سره یو ځای شوی وو.
د فاریاب والي نقیب الله فایق هم مني چې له مرګ ژوبلې څخه د مخنیوي لپاره امنیتي ځواکونو شاتګ کړی او ولسوالۍ یې طالبانو ته پریښې.
د کورنیو چارو وزارت ویاند، طارق آرین بیا د طالبانو په لاس د المار ولسوالۍ سقوط ردوي او زیاتوي چې په دغه ولسوالۍ کې زیاته اندازه امنیتي ځواکونه شتون لري.
