طالب ویاند ذبیح الله مجاهد شمشاد نیوز سره اړیکه کې افغان سیاستوالو او مصالحې شورا ته د سولې اړوند لیکونو او طرحې استول رد کړل.
تېره ورځ د مصالحې عالي شورا یو مرستیال ادعاء کړې وه چې طالبانو له دوی سره د سولې طرحه شریکه کړې ده.
د مصالحې عالي شورا اړوند یوې سرچینې شمشاد ته وویل چې لیکونه پخواني دي او تازه داسې لیک او طرحه یې نه ده ترلاسه کړې چې طالبانو دې د مذاکراتو په نیت رالېږلې وي.
یوه سرچینه وایي: ((نږدې ۸ میاشتې وړاندې یو شمېر افرادو ته لیکونه را استول شوي وو، چې په دې لیکونو اويا طرحو کې له طالبانو د ملګرتوب يا هم د سولې په خبرو کې د سیاستوالو د بې پرې پاتې کېدو په تړاو ټينګار شوی وو.))
پخواني ولسشمر حامد کرزي ته نږدې کسان هم وایي چې لیک د طالبانو له خوا ورته رسېدلی، خو دوی وایي: داسې لیکونه د سولې په راتګ کې هېڅ مرسته نشي کولای، بلکه په هېواد کې به د بې نفاق لامل شي.
سره له دې چې د طالبانو او افغان حکومت ترمنځ د خبرو جریان ټکنی شوی، خو د افغان سولې لپاره په سیمه ییزه او نړیواله کچه هڅې روانې دي چې طالبان د خبرو اترو میز ته راولي.
شنونکي بیا په دې نظر دي چې طالبان د واک وېشلو او يا چا سره د جوړجاړي نيت نلري.
شنونکي دغه راز وايي چې له ورته لیکونو د طالبانو موخه داده چې څنګه افغان حکومت منزوي کړي او په خبره يي که ورته چار پيل شي ښايي د جمهوریت صف نور هم کمزوری شي.
اوس چې د افغان حکومت او طالبانو ترمنځ د خبرو اترو جریان په ټپه درېدلی، رسنیو ته طالبانو ته منسوب هغه لیکونه راوتلي چې دوی پکې له سیاستوالو څخه په فردي بڼه د سولې د خبرو اترو د کيدوغوښتنه کړې.
