د صنعت او سوداګرۍ وزارت له لوري په صنعتي ساحو کې صنعتکارانو ته د ځمکې د ملکیت سندونه وېشل پيل شول.
د یاد وزارت چارواکي وایي، د ۱۳۰۰ شرکتونو له لوري د ځمکې غوښتنې وړاندیزونه ورته سپارل شوي چې له دې ډلې ۱۰۰ غوښتنلیکونه د حکومت له لوري منظور شوي او د ۹۱ هغو په طی مراحل کېدو سره په ۸ ولايتونو کې شرکتونو ته د ۵۰۰ جرېبه ځمکې سندونه ورکړل شول.
دوی له صنعتکارانو غواړي چې په دې ځمکو کې تر ډېره د خامو موادو د تولید لپاره زمینه برابره کړي، ترڅو له بهرنیو هېوادونو د يادو موادو واردولو ته اړتیا پیدا نه شي.
د صنعت او سوداګرۍ وزارت سرپرست نورالدین عزیزي وايي: « زه ټولو دوستانو ته یوه خبره کوم، هر صنتعکار فرد باید صادرات ولري، دویمه خبره دا ده چې خام مواد باید له داخل تهیه کړي؛ تر کومه به موږ تیاره مړۍ راوړو، ماشین ته به یې اچوو؟ د مثال په توګه، موږ وچې شیدې راوړو او آیس کریم تولیدوو.»
د صنعت او سوداګرۍ وزارت د صنعت او سوداګرۍ چارو معین احمدالله ذاهد وايي: « په دې کې د ۹۲ دوسیو منظوري د عالیقدر مقام له خوا راغلې او نن به عملا ً ځمکې ورته ووېشل شي. دا ځکې ټولټال ۶۵۰ جریبه کېږي.»
د ریاست الوزرا اقتصادي مرستیال په دې باور دی چې د يادو کارخونو د جوړولو چارو له پیل سره به ډېرو هېوادوالو ته د کار او پر ځان بسیاینې سربېره، د صادراتو او کورني بازار پیاوړتیا ته هم زمینه برابره شي.
ملا عبدالغني برادر اخوند د صنعت وده د ټولنیز ثبات او د بېروزګارۍ کچې کمولو لپاره هم اغېزناکه وبلله.
برادر په دې اړه وايي: « تل مو یادونه کړې چې اسلامي امارت تاسو او د هېواد په صنعتي سکټور کې نورو خلکو ته ژمنه درکوي چې د قیمت، کیفیت او کمیت د تأمین په صورت کې به پر بهرنیو مشابه اموالو د خوکفايي په اندازه، تعرفه لوړېږي. زه له هغو ټولو افغان پانګوالو او صنعتکارانو چې د هېواد په داخل کې یا هم بهر مېشت دي، غوښتنه کوم چې خپل صنعت، تجربه او پانګه افغانستان ته را انتقال کړي.»
ځيني نور چارواکي وایي، له غصب د دولتي ځمکو خلاصولو لپاره یې چټک اقدامات کړي او په خبره یې هڅه کوي چې يادې ځمکې له غاصبینو په راګرځولو سره د صنعتکارانو په واک کې ورکړي.
د دوی په خبره، د سرپرست حکومت اقتصاد محوره پالیسۍ له مخې اړتیا ده چې خلک د پرمختګ فکر په لرلو سره د ځان بسیاینې لپاره لازمې هڅې وکړي.
د کرنې، اوبو لګولو او مالدارۍ وزارت سرپرست عطالله عمري وايي: « دا انسان دی چې ځان رزق او روزي ته رسوي، همدا انسان دی چې ځان خودکفايي ته رسوي او دغه راز همدا انسان دی چې ځان تیارو ته رسوي. د پرمختګ او ترقۍ په فکر کې ژوند کول او ګام پورته کول هم پرمختګ دی.»
د کابل والي امین الله عبید وايي: « اسلامي امارت د کابل پر کچه ۵۷ زره جریبه ځمکه چې له غاصبینو او زورواکو خلاصه کړې، د کابل ولایت د رهبرۍ تر چتر لاندې د اسلامي امارت مختلفو ادارو ته سپارلې دي. نن همدا ځمکې دا دی تاسو ته سپارل کېږي.»
د خصوصي سکټور استازي بيا د سرپرست حکومت له لوري د ځمکو سندونو د وېشلو له امله خوښ دي او وایي، د اسلامي امارت له واک ته رسېدو راهیسې یې ۸ اساسي غوښتنو ته په مکمل ډول رسېدنه شوې، خو ځينې وړانديزونه هم لري.
د کانونو او صنایعو خونې رئیس شېرباز کمین زاده وايي: « بل وړاندیز مې دا دی چې یوازې په کابل کې ۸۰۰ کارخونې په کرايي ځایونو کې فعالیت لري. زه له وزارت او ټولو چارواکو هیله لرم دا ځمکې لومړی هغو کسانو ته ووېشي چې په کرايي ځایونو کې فعالیت لري. دویمه خبره زموږ مهاجرین دي. زه پرون ورځ په دې ډېر خوښ شوم چې دوی ته یې تقدیر نامه ورکړه. همدا اوس زموږ ډېرې کارخونې له کراچۍ او د پاکستان له نورو ښارونو را روانې دي او باید د ځمکو په وېش کې لومړیتوب ورکړل شي.»
د تازه ورکړل شویو ځمکو د یو جریب بيه ۳۰۰ زره افغانۍ ټاکل شوې چې په ۷ قسطونو کې به حکومت ته ورکول کېږي.
دغه ځمکې د هرات صنعتي پارک په څلورم فاز، د کندهار په شور اندام، د میدان وردګو کوتل تخت، د پروان په باریک آب، د لوګر په محمداغې، د خوست په سماوار باغ، د ننګرهار په شېخ مصري او د هلمند په دوراهي سیمو کې شرکتونو ته ورکول کېږي.
