افغانستان لپاره د پاکستان ځانګړي استازي په خپلو وروستیو څرګندونو کې ویلي، په افغانستان کې سوله او پرمختګ د سیمې د ثبات او ټیکاو لپاره اړین دي.
محمد صادق خان په افغانستان کې د دې هېواد په سفارت کې د پاکستان ملي ورځ نمانځنې په مناسبت جوړې شوې غونډه کې د خبرو پرمهال زیاته کړې، د سیمې د اقتصادي ودې لپاره د دواړو هېوادونو ترمنځ د اړیکو پراخېدل مهم دي.
خان افغانستان په سیمه کې د پاکستان تر ټولو مهم شریک یاد کړی او له دواړو هېوادونو یې غوښتي چې د دوه اړخیزو سوداګریزو اړیکو د پراخولو په موخه ګډ کار وکړي.
هغه زیاته کړې:« په افغانستان کې سوله او پرمختګ د سیمې د ثبات لپاره حیاتي دي. پاکستان او افغانستان باید د سیمې د اقتصادي ودې په موخه خپلې ګډې هڅې لا زیاتې کړي. افغانستان په سیمه کې د پاکستان تر ټولو مهم شریک پاتې شوی. دواړه هېوادونه باید د دوه اړخیزو سوداګریزو اړیکو د پراخولو او د سیمې د اتصال د پیاوړتیا لپاره ګډ کار وکړي.»
صادق خان د افغانستان لپاره د پاکستان ځانګړي استازي په توګه له ټاکل کېدو راهیسې، دوه ورځې وړاندې افغانستان ته په خپل دویم رسمي سفر کې د اسلامي امارت د بهرنیو چارو وزارت له سرپرست مولوي امیرخان متقي سره د لیدنې پرمهال، پر تعامل او اغېزناکو دوه اړخیزو اړیکو ټینګار وکړ.
د سیاسي چارو شنونکي د دې پاکستاني چارواکي څرګندونې هم د تېرو نورو هغو په څېر ګڼي چې تل یې د خپلو خبرو خلاف عمل کړی.
د سیاسي چارو شنونکی اختر محمد راسخ وايي: « ترهغو چې پاکستان د افغانستان د جغرافیا او ولس په اړه خپله عمق ستراتیژي بدله نه کړي، د اړیکو پراختیا ناشونې ده. د افغانستان له آدرسه زموږ ټولو مشرانو له پاکستان سره د ښو اړیکو هیلې لرلې، خو دا پاکستان دی چې د افغانستان په تباهۍ، جګړو او ناخوالو کې خپلې ګټې ګوري.»
بل پلو، د اقتصادي چارو شنونکي که څه هم له پاکستان سره د افغانستان د سوداګریزو اړیکو پراخېدل د دواړو هېوادونو پر ګټه بولي، خو وايي د دواړو لوریو ترمنځ اقتصادي او سوداګریزې اړیکې هغه مهال ښې کېدای شي چې پاکستان نړیوالو اصولو ته ژمن پاتې شي او له دې ټکي د فشار راوستو د آلې په توګه کار وانخلي.
د اقتصادي چارو شنونکی محمد یونس ځدراڼ وايي: « د افغانستان سوداګرو او حکومت ته په کار ده چې د پاکستاني چارواکو په دې ډول څرګندونو دوکه نه شي، په بدیلو لارو تمرکز وکړي او کولی شي چې د چابهار بندر له لارې له جنوبي آسیا سره وصل شي. همدارنګه موږ کولی شو د دې بندر له لارې له نړۍ سره وصل شو.»
افغانستان لپاره د پاکستان ځانګړی استازی داسې مهال د دواړو خواوو ترمنځ د اړیکو پرغځولو ټینګار کوي چې د دې هېواد پوځي او ملکي چارواکو له تېرو نږدې څلورو کالو راهیسې په پرله پسې توګه پر افغان لوري د تحریک طالبان پاکستان(ټي.ټي.پي) د ملاتړ تور پورې کړی.
د دې ترڅنګ، پاکستان پر افغان لوري د فشار راوړلو په موخه تل په یوه او بله پلمه د تورخم دروازه تړلې چې دې چارې نه یوازې د دواړو خواوو ولسونو ته ګڼې ستونزې رامنځته کړې دي، بلکې اقتصادي او سوداګریزې اړیکې یې هم له ننګونو سره مخ کړې.
