د زابل والي شمشاد سره ځانګړې مرکه کې وایي، د پاکستان پوځي رژیم د زابل ولایت اړوند د ډیورنډ فرضي کرښې په اوږدو کې هم بریدونه ترسره کړي او دا پر افغان خاوره ښکاره تېری دی.
ملا شېر محمد شریف د افغانستان په اړه د اسلاماباد پر سیاستونو نیوکه کوي او په خبره یې، پاکستان د افغانستان پر وړاندې پردۍ جګړه مخته بیایي او ټینګار یې کړی چې اختلافونه باید د خبرو اترو او ډېپلوماسۍ له لارې حل شي.
د زابل والي ملا شیر محمد شریف وايي: « زموږ مشوره دا ده چې که دا جګړې د دوی خپله پالیسي وي یا یې کوم بل څوک پرې تحمیلوي، دا باید پای ته ورسيږي؛ ځکه دا جګړې د یوه هېواد په ګټه هم نه دي. پاکستان باید دا تېروتنه تکرار نه کړي.»
د زابل والي د یوې پوښتنې په ځواب کې وایي چې له افغانستان سره ټول اختلافونه په زور نه شي حل کېدی بلکې د پاکستان حکومت باید د خبرو او سیاسي تعامل لاره غوره کړي.
دا په داسې حال کې چې په وروستیو میاشتو کې د ترینګلتیاوو زیاتوالی، متقابل بریدونه او د کډوالو د بېرته ستنېدو بحران د کابل او اسلاماباد اړیکې له نویو ننګونو سره مخ کړې دي.
د زابل والي په دې اړه وايي: « زموږ مشوره بیا هم دا ده چې دا تېروتنه ونه کړي. موږ پاکستاني پوځیانو ته په ډېر ادب او احترام وایو چې افغانان مه ځوروئ؛ ځکه دوی خپل بدل چاته نه پرېږدي او هر وخت یې چې لاس بر شي، اخلي یې.»
د زابل والي دغه راز وایي، د دې ولایت په ځیینو ولسوالیو کې د اقلیم د بدلون او د کلونو وچکالۍ له امله تر ځمکې لاندې اوبه او د کرنې د خړوبولو سرچینې دواړه نږدې ختمې شوې دي.
ملا شریف دا وضعیت د سیمې لپاره یو له تر ټولو جدي ننګونو څخه بولي، خو ډاډ ورکوي چې ډېر ژر به د اوبوکمښت ستونزه حل شي.
د والي په خبره ، د اوبو کمښت ستونزې د حل لپاره په مرکز قلات کې نهه د اوبو کوچني شبکې جوړې او ګټه اخستنې ته سپارل شوې دي. همدارنګه د دې ولایت په مختلفو ولسوالیو کې اوس هم د پاکو اوبو ۲۳ شبکې تر کار لاندې دي.
ملا شیر محمد شریف زیاتوي: « د زابل خلک مالدار دي، خو وچکالیو سخت ځپلی. که چېرې دې خلکو ته د اوبو او ځمکو بندوبست وشي، کله به هم چا ته د شکایت موقع ورنه کړي. اکثریت خلک له لرې پرتو سیمو مرکزونو ته راکډه شوي، خو مرکزونو کې هم د اوبو کچه ټیټه شوې. موږ په زابل کې دا قلیمي بدلون له امله ډېرو ستونزو سره مخ یو.»
د نوموړی په خبره، د زابل په بېلابېلو ولسوالیو کې ۱۹ پروژې بشپړې شوې چې د کاریزونو پاکول، کوچني پل چکونو جوړول او استنادي دیوالونه په کې شامل دي.
زابل د هېواد په جنوب کې پروت یو له هغو ولایتونو دی چې د پاکستان پوځ ترکنټرول لاندې سیمو او بلوچستان سره تړلي دي.
