د پاکستان او افغانستان ترمنځ د روانو ترینګلو اړیکو پر مهال، اسلام اباد تل هڅه کړې چې نړۍ ته وښيي چې د پاکستان کورنیو ناامنیو اساسي ریښه له افغانستان څخه سرچینه اخلي.
خو اسلامي امارت په مکرره توګه د یاد هېواد دغه اندېښنې رد کړې دي او ډاډ یې ورکړی چې هېچاته اجازه نه ورکول کېږي چې افغان خاوره د کوم هېواد پر وړاندې وکاروي .
د پاکستان دې اندېښنو ته په پام، اسلام اباد کې افغان سفیر د کابل او اسلام اباد ترمنځ سیاسي امنیتي او اقتصادي تحولات په مستقیم ډول پر دواړو لوریو اغېزمن بللي.
نوموړي ویلي، افغانستان نه غواړي چې خاوره یې د پاکستان پر ضد وکارول شي. خو په ورته وخت کې افغانستان دا هم نه شي منلی چې د پاکستان امنیتي اندېښنې دې په افغان خاوره کې د پوځي اقدام لپاره د توجیه په توګه وکارول شي.
سردار احمد شکېب زیاته کړې: « افغانستان نه غواړي خاوره یې د پاکستان پر ضد وکارول شي. په ورته وخت کې، افغانستان دا هم نه شي منلی چې د پاکستان امنیتي اندېښنې دې په افغان خاوره کې د پوځي اقدام لپاره د توجیه په توګه وکارول شي. که له افغانستان څخه د مشخصو اندېښنو په تړاو د همکارۍ تمه کېږي، افغانستان هم غواړي د خپلو امنیتي اندېښنو په اړه له پاکستان سره په مستقیم ډول تعامل وکړي.»
سردار احمد شکېب له پاکستانه غوښتي چې د افغانستان په اړه له پخوانیو برداشتونو تېر شي او د دې هېواد اوسنی وضعیت د اوسنیو واقعیتونو له مخې و ارزوي.
اسلام اباد کې د افغانستان سفیر ویلي: « د افغانستان اړیکې له یوه هېواد سره باید د بل هېواد په ضد د دریځ په توګه تعبیر نه شي. یو خپلواک هېواد کولی شي له ګڼو هېوادونو سره اړیکې ولري، حتا له هغو هېوادونو سره چې له یو بل سره ښې اړیکې نه لري؛ له یوه هېواد سره اړیکه باید د بل هېواد پر وړاندې د دښمنۍ یا خصومت په مانا، ونه ګڼل شي.»
غوښتنه دا ده چې دواړه کابل او اسلام اباد باید د ګاونډیتوب له اصولو سره سم خپلمنځي اړیکې وپالي او ستونزې د ډیالوګ له لارې حل کړي.
د سیاسي چارو شنونکی، ډاکټر معین ګل څکمنی وايي: « دا به د دواړو هېوادونو د ولسونو لپاره ښه زېری وي چې افغانستان او پاکستان په خپل منځ کې سره بحث وکړي او یوې نتیجې ته ورسېږي. هیله ده پاکستاني لوری هم دې غوښتنې ته مثبت ځواب ووايي او دا لړۍ د دواړو هېوادونو د بهرنیو چارو وزارتونو له خوا پيل شي.»
افغانستان او پاکستان ترمنځ سیاسي کړکېچ هواري لپاره د سیمې او ګاونډ هېوادونو هڅې وکړي، خو لا هم د کابل او اسلام اباد ترمنځ د باور فضا نه ده رامنځته شوې او په نړیواله کچه غوښتنه کيږي چې دواړه لوري باید د ډیالوګ له لارې خپلې ستونزې حل کړي، کوم چې کابل تل په دې برخه کې تر وروستي حده هلې ځلې کړې دي.
