د افغانستان پر ضد د پاکستاني چارواکو د ادعاوو په دوام، دا ځل د دې هېواد لومړي وزير شهباز شريف تېرې تکراري ادعاوې په متفاوت ډول بيان کړې دي.
نوموړي په خيبرپښتونخوا کې قومي مشرانو ته خبرو کې د پاکستاني طالبانو تحریک (ټي.ټي.پي) ته په اشارې دغه تحریک د هند نيابتي ډله بللې او ادعا يې کړې چې د هند ورته نیابتي ډلې په افغانستان کې دېره دي او د پاکستان پر ضد له هماغه ځايه عمليات کوي.
شهباز شريف که څه هم د وسله والو ډلو پر وړاندې د خپل هېواد د کلک هوډ ډاډ ورکړی، خو دا غوښتنه يې هم کړې چې د افغانستان سرپرست حکومت دې د پاکستان پر ضد د خپلې خاورې کارېدو مخنيوی وکړي.
د پاکستان لومړي وزیر ویلي: « د پښتنو زړورتیا، زغم او نه ماتېدونکې روحیه د تاریخ یو ویاړلی فصل دی. پاکستان کلک هوډ لري چې د هند ملاتړې شبکې فتنه الخوارج پر وړاندې مبارزه وکړي.»
خو اسلامي امارت د شهباز شریف دا څرګندونې د دواړو هېوادونو د اړيکو پر زيان بولي او وايي، سرپرست حکومت هېچا ته د نورو پر ضد د افغانستان خاورې کارولو اجازه نه ورکوي او دغه راز دې اسلام اباد هم په پاکستان کې د امنیت ضد پېښې له افغانستان سره نه غوټه کوي.
د اسلامي امارت مرستیال ویاند حمدالله فطرت وايي: « دا ډول څرګندونې نه یوازې دا چې اړیکې خرابوي او د بې اعتمادۍ فضا رامنځته کوي، موږ یې په اړه بار بار ویلي او بیا هم وایو چې د افغانستان خاوره د هېڅ هېواد پر خلاف نه کارول کېږي او نه هم افغانستان کې خپلسرې وسله والې ډلې فعالیت لري.»
د سیاسي چارو شنونکي بیا وايي، پاکستان دې خپل داخلي موضوعات خپله حل کړي او د افغانستان پر وړاندې دې خپل سټراټیژیک عمق کې بدلون راولي.
د سیاسي چارو شنونکی ادریس محمدي ځاځی وايي: « د افغانستان اسلامي امارت د هندوستان او پاکستان ترمنځ انتخاب نه دی کړی؛ بلکې دواړو مملکتونو سره یې اقتصادي، سیاسي او تجارتي اړیکو رغولو ته ادامه ورکړې. له دواړو هېوادونو سره یې د خپلو ډېپلوماټیکو اړیکو زیاتولو ته ادامه ورکړې. اسلامي امارت له هند او پاکستان دواړو سره دوستي غواړي او پر متقابلو اړیکو ولاړ سیاست غوره ګڼي.»
د پوځي چارو کارپوه اسدالله ندیم وايي: « د یوه داسې متوازن او متعادل سیاست غوره کول چې د ټولو طرفونو ګټې په کې خوندي وي او د هېڅ یوه طرف پر ضد نه وي، د افغانستان پر ګټه دي، کنه نو افغانستان به یو ځل بیا د نیابتي ډلو د جګړې محور وګرځي.»
پاکستاني چارواکو تل د خپلې نا امنۍ پېښې له افغانستان سره تړلې دي، خو د کارپوهانو په اند دوی غواړي له دې تکتيک پر ګټې اخیستنې سره په سياسي، اقتصادي او امنيتي برخو کې خپلې کمکارۍ توجيه کړي.
د پوځي چارو کارپوه توریالی ځاځی وايي: « پاکستان هم ښکه او هم پورته ګڼ شمېر پښتانه ووژل. د پاکستان لومړی وزیر ولې ځان ته دا اجازه ورکوي چې د افغانستان په اړه خبرې وکړي.»
شاوخوا اته ورځې وړاندې د پاکستان د پوځ ویاند هم په خیبر پښتونخوا کې یوې غونډې ته د خبرو پرمهال پر افغانستان ورته تور پورې کړ او زیاته یې کړه چې د افغانستان خاوره د هند په اشاره د پاکستان پر ضد کارول کېږي.
سرپرست حکومت تل دا ډول څرګندونې بې اساسه ادعاوې بولي.
