د تخنیکي او مسلکي زده کړو ادارې د یوې خبرې ناستې پرمهال د کورنیو چارو وزارت له نشه یي توکو سره د مبارزې معینیت او د زندانونو چارو د سمون ادارې سربیره له درېیو نورو ادارو سره هم هوکړه لیکونه لاسلیک کړل چې له مخې به یې د ټولنې محرومو کسانو ته د تخنیکي او مسلکي زده کړو زمینه برابره شي.
د دغې ادارې سرپرست غلام حیدر شهامت د زندانونو چارو د سمون ادارې له چارواکو سره د تړون لاسلیکولو پرمهال وویل، له دې سره به د ښځینه بندیانو په ګډون ټولو زندانیانو ته د تخنیکي او حرفوي زده کړو زمینه برابره شي.
د شهامت په خبره، د بند مودې له پای ته رسولو وروسته به زندانیان د مسلکي او حرفوي انسانانو په توګه ټولنې ته وړاندې شي او له اقتصادي پلوه به پرځان بسیا وي.
شهامت زیاتوي: « موږ به داسې شرایط چمتو کړو چې له مخې يې ښځینه او نارینه بندیان له مسلکي او حرفه يي زده کړو برخمن شي. دغه زده کړې به نه یوازې د بند په موده کې له دوی سره مرسته وکړي بلکې له بند تر آزادېدو وروسته به هم د معیشت او ټولنه کې له ادغام سره مرسته وکړي.»
په ورته وخت کې، د یادې ادارې او کورنیو چارو وزارت له نشه يي توکو سره د مبارزې معینیت ترمنځ هم هوکړه لاسلیک شوه چې له مخې به یې له واټونو او بازارونو راټولو شویو معتادینو ته هم د مسلکي او حرفوي زده کړو زمینه برابره شي.
شهامت وايي، له دې سره به پر نشه يي توکو روږدي کسان له درمنلې وروسته ټولنې ته د یوه کسبه کار په توګه وړاندې شي ترڅو د خپلې کورنۍ سرپرستې پرغاړه واخلي.
شهامت په دې اړه وايي: « له کورنیو چارو وزارت سره شوی هوکړه لیک د دغو کسانو د بیا توانا کولو په اړه زموږ د چارواکو د ژمنتیا څرګندونه کوي. موږ معتادینو ته د تخنیکي او مسلکي زده کړو په ورکړې سره هغوی ته فرصت ورکوو چې د اعتیاد له پرېښودو وروسته له نویو مهارتونو سره ټولنې ته ستانه شي. دغه پروګرام به نه یوازې د هغوی شخصي ژوند بدل کړي بلکې پر ټولنه به هم مثبت اغېز ولري.»
همدارنګه، د علمي او څېړنیزو اړیکو د پياوړتیا په موخه، د علومو اکاډمۍ او تخنیکي او مسلکي زده کړو ادارې ترمنځ هم په علمي برخه کې د همکاريو په موخه هوکړه لاسلیک شوه.
ورته مهال، د تخنیکي او مسلکي زده کړو ادارې له افغان ملي بانک، د افغانانو لپاره د هوسا ژوند په نوم موسسې او یوه کورني خصوصي بانک سره هم د دوه اړخیزو همکاریو په موخه هوکړې لاسلیک کړې.
