که څه هم شاوخوا دوې مياشتې وړاندې مولوي عبدالکبیر د رياستالوزرا سياسي مرستيال له څوکۍ لرې او د کډوالو او بېرته راستنېدونکو چارو وزارت د سرپرست په توګه وګومارل شو، خو تر اوسه لا څرګنده نه ده چې څوک به د نوموړي پر ځای د رياست الوزرا سياسي مرستيال وټاکل شي.
حکومتي مسوولین په دې اړه بې خبري ښيي، خو زياتوي چې يادې څوکۍ ته د کس تر مشخص کېدو وروسته به رسنيو ته مالومات ورکړي.
د سیاسي چارو شنونکي د ریاستالوزرا سیاسي مرستیال په توګه د کوم چا نه ګومارل کېدل ضعف بولي او ټينګار کوي چې ژر تر ژره بايد یو وړ کس پر يادې څوکۍ وګومارل شي.
د نړیوالو اړیکو کارپوه ابوالحسن صالحي وايي: « د دې پوسټ اهمیت ته په کتو ویلی شو چې د هغه له لارې لا ډېره همغږي کېدای شي. دغه پوسټ کولی شي د افغانستان او نړۍ ترمنځ د یوه ارتباطي پل په توګه رول ولوبوي او هغه کسان چې په دې پوسټ کې ټاکل کېږي، باید د ګاونډیو هېوادونو له سیاستونو، سیمه ییزو سازمانونو او سیمه ییزو هېوادونو په تړاو بشپړ معلومات ولري.»
که څه هم د مولوي عبدالکبیر له ګومارل کېدو وروسته د يوه وزارت تشه څوکۍ ډکه شوه، خو برعکس د رياست الوزرا د سياسي مرستيال څوکۍ خالي شوه او لاهم خالي ده.
د سیاسي چارو شنونکي له دې کبله چې له هېوادونو سره يې په اړيکو کې اغېز زيات دی، دا یوه کیلدي څوکۍ بولي.
د سیاسي اړیکو شنونکی مرتضی مطهري وايي: « خدای وکړي موږ د یوه داسې کس لیدونکي اوسو چې وکولی شي په سیاسي او ټولنیزه برخه کې له دې موقف ګټه واخلي او د خلکو ستونزې هوارې کړي.»
د رياستالوزرا سياسي مرستيال د څوکۍ خلا هغه مهال رامنځته شوه چې د کډوالو او بېرته راستنېدونکو چارو وزارت مخکېنی سرپرست په يوه ځانمرګي برید کې ژوند بایلود او پر ځای یې د ریاست الوزرا پخوانی سیاسي مرستیال مولوي عبدالکبير وګومارل شو.
