په دې وروستیو کې له ګاونډیو او سیمه ییزو هېوادونو سره د اسلامي امارت د چارواکو سیاسي تګ راتګ زیات شوی، افغان چارواکو په سیمه کې بېلا بېلو هېوادونو ته سفرونه کړي او همدا راز د هېوادونو سیاسي استازي او ډېپلوماټان کابل ته راغلي.
دغه سفرونه د سیاسي او اقتصادي اړیکو پراختیا لپاره مهم بلل کېږي.
د تهران فورم په ناسته کې د بهرنیو چارو وزارت د سرپرست ګډون او بیا له هغه ځایه چین ته سفر او هلته د چین، افغانستان او پاکستان په درې اړخیزه ناسته کې برخه اخیستل، هغه څه دي چې د سیمې له مهمو هېوادونو سره د افغانستان د سیاسي اړیکو د پراختیا ښکارندويي کوي.
همدارنګه، د روسیې په تاتارستان کې د کازان په جوړې شوې ناسته کې د ریاست الوزرا د اقتصادي مرستیال ملا عبدالغني برادر اخوند له ګډون سربېره قزاقستان، ازبېکستان او د منځنۍ آسیا یو شمېر نورو هېوادونو ته د اسلامي امارت د کابینې د غړیو سفرونه او مهمو ناستو کې ګډون او ویناوې هم له اقتصادي او سیاسي پلوه مهم ګڼل کېږي.
د سیاسي چارو شنونکي باور لري چې دغه سفرونه او سیاسي راشه درشه کولی شي د افغانستان او سیمې ترمنځ شته واټن او توپيرونه راکم کړي او په سیاسي او اقتصادي برخه کې د اتصال لپاره مهمې تګلارې رامنځته کړي.
دوی زیاتوي، له سیمې او ګاونډیو هېوادونو سره د اړیکو ټینګښت د سیمې او افغانستان د ثبات لپاره مهم دي.
د پوهنتون استاد فیض محمد ځلاند وايي: « په دې وروستیو کې په سیمه کې د سرپرست حکومت د مشرتابه له خوا ګڼې هلې ځلې پيل شوې، ترڅو سیمه کې همغږي رامنځته کړي، له سیمې سره خپل توپيرونه راکم کړي، اتصال بحث که هغه سیاسي دی که اقتصادي یا ټولنیز، دا پیاوړی کړي. په دې برخه کې هلې ځلې ډېرې مهمې او د ستاینې وړ دي او موږ کولی شو د دې هلو ځلو له لارې سیمې سره شته توپيرونه راکم کړو. دا هلې ځلې په لویه کچه نه یوازې د افغانستان بلکې د سیمې له ثبات او ټیکاو سره هم مرسته کوي.»
ځینې نور بیا وايي، د افغانستان او سیمه ییزو هېوادونو ترمنځ وروستیو سیاسي حرکتونو ته په کتو، د کابل سیاسي او اقتصادي اړیکې د لاپراختیا په حال کې دي.
د سیاسي چارو شنونکی شهزاده مسعود وايي: « زما په اند، کوم سفرونه چې په وروستیو کې د سیمې هېوادونو ته وشول، هم په سیاسي او هم په اقتصادي لحاظ له اهمیت برخمن دي. زه امېد لرم چې یوه متوازنه پالیسي له ټولې نړیوالې ټولنې سره په پام کې ونیول شي، ترڅو افغانستان د نړیوالې ټولنې د همکاریو په مرکز بدل شي.»
د کارپوهانو په اند، د هېوادونو په بلنه د افغان چارواکو سفرونه او مهمو سیمه ییزو سیاسي او اقتصادي ناستو کې یې ګډون د دې ښکارندويي کوي چې اوس د سیمې هېوادونه دې پایلې ته رسیدلي چې نور افغانستان ورته ګواښ نه دی.
دوی له هېوادونو سره د اړیکو او تعامل د ټینګښت په برخه کې د سرپرست حکومت بهرنۍ پالیسي بریالۍ یادوي، خو زیاتوي چې باید دغه هڅې لاپسې ګړندۍ شي.
د سیاسي چارو شنونکی معین ګل څمکنی وايي: « لوړ پوړو چارواکو د کازان په ناسته کډون وکړ او په حقوقي برخه کې د عدلیې سرپرست وزیر سفر او هلته غوښتنې مطرح کول، د تاشکند غونډه، له تاجیکستان سره اړیکو جوړول، د منځنۍ آسیا له نورو هېوادونو، ایران، هند او چین سره د اړیکو جوړول هغه څه دي چې د اسلامي امارت د واکمنۍ په څلورم کال یې دا وښوده چې سیمه کې د افغانستان له خاورې هېچا ته ګواښ متوجه نه دی.»
اسلامي امارت بیا تل ټینګار کړی چې بهرنی سیاست یې اقتصاد محوره دی او له ټولو هېوادونو سره ښې او پر متقابل درناوي ولاړې اړیکې غواړي.
د اسلامي امارت سرپرست حکومت تل ډاډ ورکړی چې له افغان خاورې به هېڅ هېواد ته ګواښ پېښ نه شي.
