د نړیوالو اړیکو کارپوه عبدالحی قانت وايي:« دا مذاکرات د دواړو هېوادونو لپاره مهم دي، ځکه امریکا نهغواړي،چې افغانستان له لاسه ورکړي. امریکا غواړي، له نوي حکومت سره تعامل ولري او دا تعامل به د هغوی د ګټو د تضمین پر اساس وي.»
شنونکي ټینګار کوي،چې اسلامي امارت دې هم له نړیوالو سره د خپلو ملي ګټو خوندي ساتلو پر اساس تعامل وکړي.
شنونکی قریب الرحمن شهاب وايي:« هغه مذاکرات،چې د امریکا او طالبانو ترمنځ دوحه کې کېږي پر خپله به یو لوی تحول رامنځته نه کړي،خو د یو تحول لپاره ابتدايي او مقدماتي ګامونه دي. ځکه د دوحې تړون مطابق ځینې مسایل له امریکا سره نا حل پاتې دي ،ې هغه وخت ته اړتیا لري او د امریکا متحدین هم باید په دې قانع شي،چې افغانستان کې د امریکا ا قدامات پرځای وو.»
د افغانستان د بهرنیو چارو وزارت ویلي، افغان پلاوی به دوحه کې امریکايي پلاوي سره مذاکراتو کې پر کنګل شوې پانګه، د نوي حکومت نړیوال مشروعیت، بشري ناورین مخنیوي او کابل کې د سیاسي استازولیو پر بیا پرانېستلو په تړاو خبرې وکړي.
امریکايي لوري سره دمذاکراتو ترڅنګ به افغان پلاوی د اروپايي ټولنې استازو سره هم جلا کتنې ولري.
دا پر افغانستان د اسلامي امارت له بیا واکمن کېدو وروسته د کابل او واشنګټن ترمنځ دویم پړاو مذاکرات دي،چې په دوحه کې ترسره کېږي.
