Skip to content
راتلونکې اوونۍ له افغانستانه د امریکایانو د وتلو یو کال پوره کېږي،خو لودیځ تر اوسه پورې د افغانستان له اړخه د خوندیتوب احساس نه کوي او د ترهګرۍ له ودې په اندېښنه کې دي.
دا اندېښنې وروسته له هغې زیاتې شوې،چې امریکا د اګیست میاشتې په دویمه نیټه کابل کې د القاعده شبکې د مشر ایمن الظواهري د وژلو ادعا وکړه.
امریکا او نړیوالې ټولنې د فشار په توګه له تیر یوه کال راپه دې خوا د افغانستان پر اسلامي امارت سیاسي او اقتصادي بندیزونه لګولي دي،د افغانستان بانک میلیاردونه ډالر یې کنګل کړي او ګڼ لوړپوړي طالب مشران یې په تور لیست کې ساتلي دي.
د سیاسي چارو شنونکي دغه ډول فشارونه نامناسب بولي او په باور یې بندیزونه پخپله د ترهګرۍ ودې ته لارپرانیزي.
د سیاسي چارو شنونکی احمد خان اندړ وايي:«نړۍ او په ځانګړي ډول زبرځواک هېوادونو سړه جګړه بیا روانه ده او دوی په شدت سره یو بل ته بهانې نیسي او موږ نه غواړو،چې زموږ ګران هېواد او خلک د دوی د نیابتي جګړې یو ځل بیا ښکار شي.»
د امریکا پخواني جنرالان،چې دلته یې ماموریت کړی،لودیځو رسنیو ته ویلي، له افغانستانه وتل یې تېروتنه ده او ډاډه نه دي،چې دوی به راتلونکې کې خوندي اوسي.
د ناټو پخوانی سرمنشي اندروس فوګ راسموسن پر خپله ټویټر پاڼه لیکي، افغانستان کې باید د اسلامي امارت ضد ډلو ملاتړ وشي.
راسموسن زیاته کړې:«نړۍ افغانستان نه شي هیرولای. لویدیځ حکومتونه باید د اسلامي امارت د ظلمونو او ځورونې ډک حاکمیت پر وړاندې د جګړه کوونکو مخالفینو ملاتړ وکړي.»
تراوسه پورې کومې ډلې اسلامي امارت تر خپل فشارلاندې نه دی نیولی،خو کله کله د داعش بریدونه یوه نیمه ننګونه رامنځ ته کوي،چې د بریدونو موخه یې افغانستان کې ولسي خلک وي.
د سیاسي چارو شنونکی محمد رادمنیش بیا وايي، د امریکا او نړیوالې ټولنې اوسني فشارونه سیاسي موخې لري.
امریکا هڅه کوي،په افغانستان کې د داعش او القاعدې په تړاو له اسلامي امارت سره یو ډول هوکړه ولري،خو اسلامي امارت بیا ویلي،دوی د وسله والو ډلو د ماتولو وړتیا لري او نه پرېږدي،چې افغانستان خاوره د چا پرضد وکارول شي.
