شنونکي: واشنګټن بیا پاکستان د خپلو ستراتیژیکو ګټو لپاره کرایه کړی

له تېرو دوو ورځو راهیسې د پاکستان پوځ مشر قمر جاوېد باجوه  په واشنګټن  کې  دی او هلته یې  د دغه هېواد  دفاع وزیر لوېد اسټین سره د افغانستان پر سر خبرې کړي دي.

د سیاسي چارو یو شمېر شنونکي وايي، امریکا بیا غواړي،په سیمه کې ترهګرۍ سره د مبارزې لپاره پاکستان د ځان ملګری کړي،خو افغانستان ونه شو کولای،چې سیمه د خپلو ګټو لپاره له ځانه سره ملګرې کړي.

دغه راز دوی وايي، پاکستان د امریکا په غېږه کې پروت دی او د امریکا د ګټو لپاره به سقوط کوي.

د سیاسي چارو شنونکی عصمت قانع وايي:« زه فکر کوم،چې په ټوله سیمه کې د ډېرو ستراتیژیکو موقیعتونو پرسر باندې سیمه ییز تقابل روان دی. په دې کې امریکا له ډېرو دې مسایلو ته متوجه ده. د هغوی تمرکز پر همدې لوبه  ده او دا لوبه خاص پړاو کې ده. امریکا غواړي، پاکستان سره داسې اړیکې وپالي،ترڅو پاکستان وکولی شي، د امریکا د ګټو لپاره د چین په خلاف تر یوې اندازې پورې حفظ کړي او پاکستان دا نه شي کولی.»

د سیاسي چارو شنونکی طارق فرهادي بیا وايي، پاکستان په کور دننه له سیاسي او اقتصادي انزوا سره مخ دی،خو افغانستان کولی شي په فعالې ډیپلوماسۍ  سره هغه لوبه چې د امریکا او پاکستان ګټې ساتي، په خپله ګټه راوڅرخوي،چې د دې لپاره په کور دننه ملي روغې جوړې ته اړتیا ده.

فرهادي زیاته کړه:«افغانان باید افغانستان کې د روغې جوړې لار پیداکړي، د دې لپاره چې بهرني ګواښونه زیات شوي دي. داعش هم شته او پاکستان هم غواړي،د ټي تي پي لپاره افغانستان کې عملیات وکړي او دا وضعیت نور هم خرابوي. د دې لپاره ملي روغې جوړې اړتیا ده.»

د پاکستان او امریکا د اړیکو تازه فصل داسې مهال پیل کېږي،چې د پاکستان خاوره د امریکا له لوري د افغانستان پر خلاف کارول کېږي،چې په همدې ټکي د کابل اړیکې له دواړو هېوادونو سره ښې نه ښکاري.