Skip to content
ملګرو ملتونو افغانستان کې د ناورین مخنیوي په موخه د سویس په جنیوا کې یو لوی کنفرانس ته تابیا نیولې او تمه ده، ګڼ هېوادونه او سازمانونه په دې غونډه کې افغانستان سره بشري مرستې اعلان کړي.
د سیاسي چارو یو شمېر شنونکي وايي، په دې کنفرانس کې دې مرستو جلبولو سربیره د افغانستان په چارو کې د ګاونډيو هېوادونو د مخنیوي غوښتنه هم وشي.
د سیاسي چارو شنونکی هلمند هلمند وايي:« د جینوا کنفرانس کي دې د افغانانو د فقر په تړاو ګټورې مرستي وشي،ځکه افغانان په سخت اقتصادي بحران کي قرار لري.»
اخوا یو شمېر نور بیا ټینګار کوي،چې د کنفرانس غړي هېوادونه او بنسټونه دې د افغانانو وضعیت ته په کتو مرستې وکړي او نه دې پرېږدي،چې میلیونونه افغانان له ناورین سره مخ شي.
د سیاسي چارو شنونکی زمان ګل دهاتي وايي:« نړیوال دې له طالبانو سره مذاکرات وکړي. افغانانو سره دې مرستي وشي او افغان ولس دې په نظر کي ونیسي،چي دامهال له سختو ستونزو سره مخ دی.»
بل پلو د اقتصادي چارو شنونکي بیا وايي، د کېدونکې مرستې یوه برخه دې په بنسټیزو پروژو ولګول شي،تر څو افغانانو ته اوږدمهاله کاري فرصتونه برابر کړي.
د اقتصادي چارو شنونکی نجم الدین سیاس وايي:« دافغانانو د اقتصادي فقر د مخنیوي ترڅنګ په زیر بناو هم کار وشي،ځکه دا مهال افغانستان زیاتو مرستو ته اړتیا لري.»
له افغانستان سره د بسپنې راټولولو په دغه نړیوال کنفرانس کې چې د دوشنبې په ورځ د سویس جنیوا ښار کې جوړېږي،ملګري ملتونه هڅه کوي،نړیوال د طالبانو تر واکمنۍ لاندې افغانستان سره د بېړنیو مرستو ژمنې وکړي.
ملګري ملتونه وايي دامهال اتلس میلیونه افغانان بېړنیو مرستو ته اړتیا لري او نړيواله ټولنه مسوولیت لري،چې افغانانو سره مرستې وکړي.
