د سیاسي چارو شنونکی حکمت الله حکمت وايي:« نړیواله ټولنه د افغان حاکمیت له لوري د مشخصو ګامونو انتظار باسي. د امریکا له لوري په مناسباتو کې سوړ والي لامل دادی،چې افغان لوري تر اوسه د امریکایانو پوښتنو او مشروع غوښتنو ته جواب نه دی ویلی،ځکه پکار ده،چې عملآ په سیاست کې بې طرفي او د مثبت ګامونو اخېستلو په برخه کې د افغانستان اسلامي امارت همدا نن فکر وکړي نه سبا.»
ځینې نور بیا په دې باور دي، چې لوېدیځ غواړي په داسې میکانیزم مخکې لاړ شي،چې ګټې یې په کې خوندي وي او د افغانستان دولت لپاره په کار ده،چې د امریکامتحده ایالتو، چین او روسیې د اړیکو په برخه کې بې طرفه سیاست غوره کړي.
دوی وايي، د امریکا له متحده ایالتو او د ناټو سازمان غړو هېوادونو د افغانستان ګوښه پاتې کېده هم دافغانانو پر زیان دي.
د سیاسي چارو شنونکی هاتف مختار وايي:« غرب هم غواړي،چې له افغانستان سره په داسې یوه میکانیزم باندې کار وکړي،کوم چې د غرب ملي منافع تر پښو لاندې نه کړي. د افغانستان نظام لپاره اړینه داده،څومره ژر چې کولای شي،دغرب ، چین او روسیې ترمنځ په \ناپیلې سیاست له مخې له غرب سره خپل روابط ښه کړي. موږ د امریکا اوناټو نه په فاصله کې پاتې کیږو. دا د افغانستان د ملي منافعو په خلاف ده.»
هغه زیاته کړه:«اوس هم باید افغانستان یوازې پرې نږدي،د افغانستان کنګل شوې پیسې باید خوشې کړي او د افغانستان حکومت باید پر رسمیت وپیژني.هو! په افغانستان کې دې هم اصلاحات راوستل شي او د اصلاحاتو لپاره چې نړیوال په افغانستان کې کومې برنامې لري،هغه دې اسلامي امارت ته وړاندې کړي.»
په لومړي سر کې چې تازه نړۍ ته منل شوی حکومت هم سقوط شوی و،خو بیا هم افغانستان د نړۍ د ژبې پرڅوکه قرار درلود، د امریکا متحده ایالتو او نورو غربي هېوادونو لېوالتیا درلوده،چې له افغان لوري سره ناستې ولري او پر مهمو سیاسي مسایلو بحثونه وکړي،خو د ۱۱ میاشتو په تیرېدو سره ورو ورو د نړۍ لېوالتیا له افغانستان سره کمه شوې ده.
