Skip to content
د سیاسي چارو یو شمېر تحلیل کوونکي وايي، ټاکل شوې ده په دوحه کې د بن په شان یوه ناسته جوړه او ټول سیاسیون او طالب مشران په کې د نوي حکومت اعلان وکړي.
په سیمه ییزه کچه هم د افغانستان په اړه بحثونه روان دي، چې طالبان وهڅول شي د ټولو خواوو څخه یو حکومت جوړ کړي.
د پوهنتون استاد فیض محمد ځلاند وايي: «له پرون راهیسې د قطر ځانګړی استازی قحطاني په کابل کې دی. له هغه سره ناستې او خبرې شوي دي، ترڅود نوي حکومت جوړولو لپاره په یوې نوې پروسې کار وشي، چې په هغه پروسه کې قطر غواړي رول ولوبوي.
په قطر کې یوه ستره د بن په شان ناسته وشي، چې هغه کې ټول سیاسیون طالبانو سره کېني او د نوی حکومت د رامنځ ته کېدو لپاره په کې اعلان وشي، په دې مسایلو بحثونه روان دي، چې د اګسټ ترپایه به صورت ونسي او د سپټمبر اوله اونۍ کې به د نوي حکومت د رامنځ ته کېدو لپاره عملي ګامونه پورته شي.»
د قطر د بهرنیو چارو وزارت استازي کابل کې د طالبانو، پخواني ولسمشر حامد کرزي، عبدالله عبدالله او د حزب اسلامي مشر سره د افغانستان په سیاسي وضیعت خبرې کړي دي.
د ملي روغې جوړې عالي شورا مشر عبدالله پر خپله فیسبوک پاڼه لیکلي چې په یوه داسې حکومت ټینګار شوی دی چې نړیوال مشروعیت ولري.
عبدالله زیاته کړې: «دواړو خواوو د سیاسي پروسې په بریالیتوب ټینګار وکړ چې په پایله کې داسې دولت رامنځ ته شي چې وتوانیږي، ملي او نړیوال مشروعیت خپل کړي او د افغانانو غوښتنې او ارادې منعکس کړي.»
د سیاسي چارو تحلیل کوونکي وایي، قطر غواړي د طالبانو او سیاسیونو باور ترلاسه کړي او په نوي جوړېدونکي حکومت کې رول او نفوذ ولري.
د سیاسي چارو تحلیل کوونکی عبدالحې قانت وايي: «دغه ناستې او سفر د دوو هدفونو لپاره دي. یو هدف دا ده چې قطر د سولې په پروسه کې له لومړي سره د منځګړي رول درلود، کله چې د امریکا او طالبانو توافق وشو، وروسته بین الافغاني مذاکراتو کې هم ښکیل و. اوس بې اعتمادي شته کېدای شي د دې لپاره وي. دویم قطر کې طالبانو لپاره د دفتر پرانېستل وو، چې ۲۰۱۴ کال یې طالبانو سره ښې اړیکې جوړې کړي د دې لپاره چې لاقوي شي، قطر غواړي نوی حکومت په اعتماد کې واخلي. راتلونکې کې د افغانستان په حکومت کې ځای ولري. سیاسي نفوذ لپاره قطرهڅه کوي ټولو لورو سره کېني او د هغوی اعتماد ترلاسه کړي.»
ایران، پاکستان، روسې او چین هم ټینګار کړی چې نړیواله ټولنه افغانستان کې د حکومت له جوړېدو سره مرسته وکړي.
پرون داسې راپورونه هم ورکړل شول چې د سی.آی.ای یو مشر کابل کې له ملا برادر سره لېدلي، خو طالبان ویلي، د اوس لپاره په دې اړه څه نه شي ویلی.
