د سیاسي چارو یو شمېر شنونکي وايي، په نړۍ کې جلا وطنه حکومتونو پایلې نه دي ورکړي او په دې تړاو هڅې بې ځایه دي.
دوی وايي، سیاسیونو افغان ولس سترو تحولاتو ته یوازې پریښی او بهر ته په تلو سره یې هغه اخلاقي موقف هم له لاسه ورکړی دی، چې د جلا وطنه حکومت تشکیل لپاره اړین وي.
سیاسي چارو شنونکی عبدالستار سعادت وايي: «دې خلکو د افغانانو له څنګه تیښته انتخاب کړې او په داسې اخلاقي موقف کې نه دي،چې دوي دې جلا وطنی حکومت تشکیل کړي. د نړۍ په هېڅ ځای کې جلا وطني حکومت پایله نه ده ورکړې او که نتیجه یې هم درلوده، نو له اخلاقي موقفه برخمن وو. زه فکر کوم، دوی ډېر زیات بد اخلاقي موقف کې دي،خلک ترې نفرت لري.»
ځنې نور بیا وايي، د پخواني حکومتي چارواکي او سیاسیون چې اوس په بهرنیو هېوادونو کې میشت دي،هڅې پیل کړي،چې د جلا وطنه او یا هم د مقاومت په نوم په افغانستان کې خپلو بندو پانګو ته ځان ورسوي.
سیاسي چارو شنونکی نبي افغان وايي:«دوی غواړي،چې په یو ډول قدرت کې دخیل ووسي او دلته افغانستان کې یې پانګې او سرمایې بندې دي او هڅه کوي،چې خپلې سرمایې ترلاسه کړي.»
دوی دغه چارواکي او سیاسيون د قدرت تږي بولي او نیوکه پرې لري،چې د ولس په وینه یې ځانته ژوند برابر کړی او اوس یې ملت یوازې پرېښی دی.
د سیاسي چارو شنونکی شعور نیازی وايي:« د قدرت ټیکه داران دي د قدرت تږي دي او په کلونو کلونو یې د ملت وینې وځبیښلې،پیسې یې تاراج کړې او ملت یې چور کړ. دوی ملت نه لري،که ملت یې درلودای،نو تیښته به یې نه کوله او دلته به یې ځای درلود او پاتې به وو.»
استاد سیاف،عطامحمد نور، جنرال عبدالرشدی دوستم ، محمد محقق،کریم خلیلي او ځينې نور پخواني چارواکي او سیاسیون په بهر کې د مقاومت په نوم د جبهې جوړېدو اعلان وکړ، خو اوس ویل کېږي چې دغو کسانو د محمد حنیف اتمر او معصوم ستانکزي پر مشرۍ د جلا وطنه حکومت د جوړښت هڅې پیل کړي.
