که له یوې خوا په دې وروستیو کې د اسلام اباد او نوي ډهلي ترمنځ اړیکې کړکیچنې شوې، بله خوا د کابل او ډهلي ترمنځ اړیکې په تودېدو دي.
د يکشنبې په ورځ د هند بهرنیو چارو وزارت ځانګړي استازي او په ياد وزارت کې د افغانستان، ایران او پاکستان څانګې رییس انند پرکاش کابل ته د سفر پرمهال د بهرنیو چارو وزارت له سرپرست مولوي امیرخان متقي او نور چارواکو سره وليدل.
په دې ليدنو کې د کابل او نوي ډهلي ترمنځ پر سیاسي، اقتصادي، سوداګریزو او د سیمې په سیاسي تحولاتو خبرې شوې دي.
د نړیوالو اړیکو کارپوهان کابل ته د هندي پلاوي سفر د کابل او نوي ډهلي د اړیکو پراختیا لپاره مهم ګام بولي او ټینګار کوي چې دواړه لوري دې د اړيکو لا پراختيا لپاره منظمه تګلاره غوره کړي.
د نړیوالو اړیکو شنونکی ابولحسن صالحي وايي: « هند د افغانستان اقتصادي پراختیا، زیربنايي پروژو پلي کولو، د تحصلي بورسونو ورکولو او بشرودستانه مرستو چمتو کولو په برخه کې نسبت نورو آسیايي هېوادونو ته مخکښ رول لري. تازه لیده کاته هم کولی شي افغانستان کې د هندي پانګوالو پانګونه اچونې ته لا ډېره زمینه برابره کړي.»
ځينې نور بیا اوسني شرايط د هند او افغانستان د اړيکو پراختيا لپاره مناسب بولي او زیاتوي، له دې فرصت د استفادې لپاره دې دواړه لوري اعظمي ګټه واخلي.
د سیاسي چارو شنونکی عبدالصادق حمیدزوی وايي: « تعاملات او ډېپلوماسي به نور هم پراخېږي او دا په خپله سیاسي او اقتصادي ثبات ته لاره جوړوي او افغانستان ته ګټه رسوي.»
د هند بهرنیو چارو وزارت ځانګړي استازي پرحکومتي چارواکو سربېره له پخواني ولسمشر حامد کرزي سره هم ليدلي او د افغانستان او سيمې پر وضعيت يې نظرونه تبادله کړي دي.
کرزي په دې لیدنه کې غوښتنه کړې چې هند دې افغان ځوانانو ته تحصیلي بورسونو ورکړې او دغه راز دې په دې هېواد کې د افغان زده کړیالانو ستونزې حل کړي.
د سیاسي چارو شنونکي هم ټينګار کوي چې سرپرست حکومت دې د دا ډول لیدنو له لارې د هند له لوري افغانانو ته د سوداګریزو، روغتیايي او تحصیلي ویزو د ورکړې پراسانولو سربېره، په ياد هېواد کې د مېشتو افغان زده کړیالانو ستونزو ته رسېدنه وکړي.
د نړیوالو اړیکو شنونکی سمیر انګار وايي: « د افغانستان او هند ترمنځ د ساسي، اقتصادي او سوداګریزو اړیکو پراخول مهم دي، خو ترڅنګ یې باید د افغان محصلینو تحصیلي ستونزو او د سوداګرو تجارتي ستونزو هوارولو ته هم پاملرنه وشي، ترڅو د دواړو هېوادونو ترمنځ د متقابل احترام فضا رامنځته شي.»
کابل ته د هند د بهرنیو چارو وزارت ځانګړي استازي سفر داسې مهال دی چې په دې وروستیو کې د هند او پاکستان ترمنځ د کړکېچ له زیاتوالي سره سم، اتاري او واګه بندرونه تړل شوي او له امله يې د هند او افغانستان ترمنځ صادرات او واردات هم زيانمن شوي.
