د سیاسي چارو یو شمېر شنونکي وايي، د روسیې او هند له لوري د افغانستان په تړاو ناستو ته چمتووالی او د منځنۍ اسیا او ګاوندیو هېوادونو له لوري افغانانو سره د اقتصادي او بشري مرستو دوام هیلې زیاتې کړي دي، چې افغانستان به په راتلونکي کې له سیمې او نړۍ سره ښې او نږدې اړیکې ولري.
شنونکی خیرالله شینواری وايي: «په دې وروستیو کې د مرکزي اسیا هېوادونو له خوا د لوړ رتبه چارواکو راتګ افغانستان ته، د سوېلي اسیا هېوادونو ګرمې ناستې او د دوی سیاسي دریځ څرګندوالی، د دغو هېوادونو او د سیمې اقتصادي همکاریو اطمنان او افغانستان ته د دوی د بشري مرستو رارسیدل، دا هغه مثبت ټکي دي، چې په راتلونکي کې به افغانستان د سیمې او نړۍ سره ښې اړیکې ولري.»
شنونکي د نړیوال مشروعیت لپاره د سیمې باور او ګاونډیانو سره د افغانستان پراخه اړیکې مهمه بولي او زیاتوي، په دې سره به له نړۍ سره د افغانستان پرې شوې اړیکې بیا وصل او د مشترکو ګټو نوی باب به پرانېستل شي.
شنونکی حکمت الله حکمت وايي: «په نړیوالو اړیکو کې د مثبتې بې طرفۍ په ساتلو سره سیمه لومړیتوب لري. سیمه پر نړیوالو اړیکو تاثیر لري، که موږ په سیمه کې د مشروعیت د ترلاسه کولو ګام واخلو، نو نړۍ به اړه وي، چې زموږ د مشروعیت د منلو لپاره لاس په کار شي او په دې کار کې باید لومړیتوب هغو هېوادونو ته ورکړل شي، چې موږ سره په عملي توګه ریښتینې همکاري کوي او لاس راکوي.»
په ټوله کې د نړیوال مشروعیت لپاره له اسلامي امارته د انعطاف ښودلو غوښتنه کېږي او هغه شرایط،چې نړیوالې ټولنې د نوي حکومت د رسمیت پيژندو لپاره ایښي پر منلو یې ټنیګار کېږي.
غوښتنه دا ده چې اسلامي امارت دې له ناورین څخه د افغانستان ژغورلو لپاره د نړیوالو مشروع غوښتنې ومني او نه دې پرېږدي، چې هېواد له نورو نړیوالو بندیزونو سره مخ شي.
