یو شمېر شنونکي وايي، د تورخم او سپین بولدک سوداګریز بندرونه د پاکستان له لوري د امنیتي اندېښنو پر پلمه تړل شوي او په خبره یې دغه حالت د دواړو هیوادونو د سوداګرو او ولسونو په ګټه نه دی او باید ستونزه د خبرو له لارې حل شي.
دوی ټينګار پر دې کوي،چې باید دواړه لوري د سوداګرۍ په برخه کې هغو تعهداتو ته ژمن پاتي او عملي یې کړي،چې وړاندې پرې توافق شوی دی.
شنونکي عزیز معارج وايي:«کله چې لارې بنديږي او د یوې او بلې خوا شرایط نه منل کېږي،نه یوازې دا چې افغان تجاران زیان ګوري او میوې یې خرابېږي، د پاکستان لپاره هم افغانستان ستر مارکیټ دی او تل یې په افغانستان اتکا کړې او ټول خوراکي توکي یې دلته راځي،نو خامخا دوی هم ضرر کوي. غوره دا ده،چې دواړه لوري خپلو ملتونو ته زجر ورنه کړي او هغو تړونونه چې لاسلیک یې کړي دي، عملي یې کړی او درناوی ورته وکړي.»
له ډیورند وراخوا بیا باور دا دی،چې پاکستان له امنیتي پلوه اندیښنه لري او پر همدې اساس یې دتورخم دروازه تړلې ده.
پاکستانی خبریال طاهر خان وايي:« پر سوداګرۍ تګ راتګ او اړیکو باندې به منفي اغیز ولري،د طالبانو حکومت یوازې دوه میاشتې پوره شوي او زما په فکر د پاکستان په پالیسیو کې ځکه د طالبانو ګذاره په کار ده،چې بیا مشکل ورته پیدا کیږي او پاکستان هم دامنیتي ملحوظاتو له مخې تورخم دروازه تړلې ده. داخبره سمه ده،چې داسې ګامونه اخېستل کېږي،پر سوداګرۍ اغیز پرې باسي.»
اسلامي امارت هغه مهال د پاکستان پي ای اې او د افغانستان کامیر هوايي شرکتونو ته خبرداری ورکړ،چې تر اسلام اباد یې دیولوري ټکټ تر دوه نیم زره ډالرو ورساو.
له دغو هوايي شرکتونو غوښتنه دا وه،چې د خپلو ټکټونو بیې دې د پخوا پر څير کړي،چې له دې پرته به ورته اجازه ورنه کړل شي، له دغه خبرداري وروسته د پاکستاني پي ای اې هوايي شرکت کابل ته خپلې الوتنې بندې کړې.
