د سیاسي چارو یو شمېر شنونکي وایي، د پاکستان له لوري جرم کول او په خپله څېړل یې مطلوبه پایله نه لري او افغان حکومت باید دا مسله جدي ونیسي.
دوی وايي، د دیارلس ورځو په تېرېدو تر اوسه په اسلاماباد کې د افغان سفیر د لور سلسلې علي خېل د اختطاف او شکنجې قضیه کې د پام وړ پرمختګ نه دی راغلی.
که څه هم ولسمسشر غني له پېښې دوه ورځې وروسته بهرنیو چارو وزارت ته هدایت ورکړ چې له اسلاماباد نه خپل سفیر او دیپلومان کابل ته را وغواړي، خو تر اوسه د بهرنیو چارو وزارت له لوري بل کوم اقدام نه ده شوی او دغه وزارت خبرو ته تیار نه ده.
د یادې قضیې د هراړخېزو څېړنو لپاره له کابله اسلاماباد ته یو پلاوی هم تللی،خو د سیاسي چارو شنونکي وايي، زیات باور نه شته چې تللی پلاوی دې له لاسته راوړنو ډک راستون شي.
د سیاسي چارو شنونکی صلاح الدین سعیدي وايي: «زه خوشحاله یم افغان حکومت داسې جدي اظهارات وکړل، جدي موقفونه یې ونیول، په دې کې تداوم په کار دی او د پاکستاني استبلیشمینټ ماهیت افشاء کول په کار دي، هیت تللی، خو زه پر دې کلک بارو لرم چې هم جرم کول او هم یې څېړل د دوی په لاس به دا مطلوبه پایله ونه لري.»
دې قضیې په کور دننه او بهر د افغانانو سخت غبرګونونه راوپارول چې آن کابل کې د پاکستان سفارت دروازه هم د څو ساعتونو لپاره د اعتراض کوونکو له خوا وتړل شوه.
د سیاسي چارو یو شمېر شنونکي وایي، د کابل له اړخه مناسب اقدام شوی،خو اوس چې افغانستان په جګړه کې ښکیل دی، ښایي تر دې اخوا اقدامات نور هم د دوو هېوادونو اړیکې خرابې کړي.
د سیاسي چارو شنونکی شيرحسن حسن وايي:« افغان حکومت هم مناسب اقدام کړی دی،له پاکستان څخه یې خپل سفیر راغوښتی دی او دغه قضیه یې په کافي اندازه جدي نیولې. ولې په ډیبلوماټکو مناسباتو کې تر دې زیات نور پرمختګ،چې هغه د نورو اختلافاتو لامل شي داسې څه نه ښایي او افغان حکومت هم په داسې حالت کې نه ده، د جګړې سره مخ ده.»
د پاکستان لومړي وزیر عمران له پيښې سره سم د خپل هېواد د کورنیو چارو وزارت او د اسلام اباد پولیسو ته ۴۸ ساعتونه وخت ورکړی وو، چې اختطافچیان ونیسي او سزا ورکړي، خو داسې ښکاري چې اسلام اباد هم د کابل په څېر د یادې قضیې څېړلو او سپیناوي ته ارزښت نه دی ورکړی.
