د سرپرست حکومت له بیا واکمنېدو وروسته د افغان سولي لپاره د امریکا ځانګړی استازی زلمی خلیلزاد د یوه پلاوي پر مشرۍ په لومړي ځل کابل ته راغلی او د بهرنیو چارو له سرپرست وزیر مولوي امیر خان متقي سره يې لېدنه وکړه.
خلیلزاد او سر متقي په دې لېدنه کې د دواړو هېوادونو تر منځ په سیاسي، کونسلي او ډیپلوماټیکو اړیکو د بحث ترڅنګ د امریکايي وګړي جورج کګلیزمن په خوشې کېدو هوکړه کړې او له دوه کلن بند وروسته یې ازاد کړی دی.
د سیاسي چارو شنونکي د امریکايي وګړي ازادیدلاو افغانستان ته د امریکايي پلاوي راتګ د کابل او واشنګټن ترمنځ د مثبتو اړیکو پیلامه بولي.
د سیاسي چارو شنونکی واحد فقیري وايي:« ښاغلی ټرمپ کوښښ کوي هغه امریکايان چې په بهر کې بندي دي، هغه خلاص شي. دا چې یو بندي سمدسي خلاص شوی دی، دا هم دا ښيي چې د ښاغلي ټرمپ پیغام طالبانو ته کلک او سخت و.»
ځينې نور بیا په دې باور دي چې د امریکايي وګړي خوشې کېدل به د یاد هېواد تر څنګ له نورو هېوادونو سره د افغانستان پر اړیکو مثبتې اغیزې ولري.
دوی زیاتوي، خلیل زاد د دوحې تړون په لاسلیک کولو کې مهم رول لوبولی او شتون به يې د امريکا او اسلامي امارت ترمنځ د تعامل پراختيا ته لار هواره کړي.
د سیاسي چارو شنونکی فیض محمد ځلاند وايي:« خلیل زاد او اډم بولر هغه کسان وو چې د دوحې تړون په لاسلیک کولو او پرمختګ کې یې مهم رول لوبولی وو. دوی له طالبانو سره په اړیکه کې ښه بلد دي. د دوی بېرته راتګ له افغانستان سره د امریکا ډېپلوماسۍ په برخه کې ماته ښکاري چې چتګ پرمختګونو ته به زمینه برابره شي. موږ ته پکار ده چې له نړۍ سره او په ځانګړي توګه امریکا او لوېدیځ سره خپل توپېرونه راکم کړو، د باور فضا رامنځته کړو.»
که څه هم د امريکا اوسني ولسمشر ډونالډ ټرمپ څو ځلې د افغانستان په اړه په خپلو خبرو کې ضد او نقیض څرګندونې کړې خو وبه ولېدل شي چې د ښه نېت پر اساس د ياد امريکايي بندي خوشې کېدل به د افغانستان په اړه امریکا پر تګلاره څومره مثبت اغېز وکړي؟
