د سیاسي چارو یو شمېر شنونکي وايي، د افغانستان په اړه سیمه ییزو ناستو او کابل ته د لوړ پوړو چارواکو تګ راتګ سره سره بیاهم هېڅ هېواد نه دی حاضر شوی، چې د افغانستان نوی دولت پر رسمیت وپېژني.
شنونکی طارق فرهادي وايي:« تر دې مهاله چې کومې ناستې د افغانستان په اړه جوړې شوې دي، ښې وې، خو تر اوسه پورې یې مطلوبه پایله لاسته نه ده راغلې او هغه دا ده،چې افغانستان پر رسمیت وپېژندل شي. ان یو اسلامي هېواد هم نه دی حاضر شوی، چې افغانستان پر رسمیت وپېژني او شرایط یې هم واضع دي.»
په افغانستان کې د وروستیو پوځي او سیاسي تحولاتو او د اسلامي امارت له واکمنېدو وروسته کابل سره د نړۍ هېوادونو ډیپلوماتیکې اړیکې پرې شوي او د دغواړیکو د بیا رغولو لپاره تر اوسه د واکمن نظام له خوا پيل شویو هڅو جوته پایله نه ده ورکړې.
د سیاسي چارو یو شمېر شنونکي بیا په دې باور دي، چې د افغانستان وروستي تحول ځنې هېوادونه اندېښمن کړي او د خپلو اندېښنو حل لپاره د سیمې پر کچه ناستې ترسره کوي.
شنونکی عزیز معارج وايي:« دغه هېوادونه خپلې موخې لري، خپلې ګټې او خپلې اندېښنې لري، خپل اطمنان اخلي، راځي کابل ته خپله ارزیابي کوي او امتیاز اخلي. تر اوسه پورې یې دافغانستان لپاره هېڅ ګټه نه ده کړې او یوه هېواد هم افغانستان پر رسمیت نه دی پېژندلی.»
روسیه، ایران او هند هغه هېوادونه دي، چې د افغانستان په تړاو یې سیمه ییزې ناستې جوړې کړي او تازه چین هم یوې ناستې ته تابیه نیولې ده.
