په کابل کې د لویې جرګې تالار کې د علماوو ستره ناسته کې د افغانستان اسلامي امارت امیرالمؤمینین شیخ هبة الله اخوندزاده وینا، د امارت د نورو چارواکو خبرو او عمل برخلاف ټکو یې اندېښې راپورته کړي،چې ګواکې د امارت دمشرتابه او چارواکو د نظریاتوترمنځ تفاوتونه موجود دي.
دعلماوو په غونډه کې شیخ هبة الله اخوندزاده، د کورنیو چارو د سرپرست وزیر سراج الدین حقاني هغه خبرې په یوډول رد کړې،چې ګني د پخواني حکومت له مسلکي غړو دې استفاده وشي او همدا راز په زغرده یې وویل، له نړۍ سره یو ګام هم مخته نه ځي او تعامل نه کوي،خو د بهرنیو چارو وزیر یې همدا اوس په دوحه کې د یوه لوړپوړي افغاني پلاوي په مشرۍ له امریکا سره د سیاسي اړیکو د ټینګښت لپاره پر مذاکراتو بوخت دی.
دا دنظر هغه تفاوتونه دي چې دڅارونکو پام وراوښتی دی .
د سایسي چارو یو شمېر شنونکي وايي، د افغانستان اسلامي امارت د مشرتابه او لوړپوړو چارواکو ترمنځ پر ځینو مسایلو د نظر اختلاف موجود دی او باید د نظر دغه اختلاف له منځه لاړ شي، له دې پرته به یې پایلې ګواښوونکې وي.
د سیاسي چارو شنونکی عزیز معارج وايي:« ملا یعقوب وايي، پرموږ باندې نیوکه وکړئ،ةچې اصلاحات راشي، د کورنیو چارو سرپرست وزیروايي پخواني کسان زموږ وروڼه دي او د هغوی له مسلک باید استفاده وشي،خوامیرالمؤمنین دا ډول مسایل رد کړل او وویل،موږ چاته اړتیا نه لرو او هغوی که راځي رادې شي،خو شر دې نه جوړوي. د نظر دغه اختلاف په دې دلالت کوي،چې د دوی ترمنځ اختلاف د نظرموجود دی، ملاهبت الله هم وویل،اختلافات حکومت ضعیفوي او دا واقعت هم ده،که چیرې دا ټول اختلافات د دوی دوام وکړي،په راتلونکې ددوی د حکومت د بقاء تضمین سخت دی،چې څوک یې وکړي.»
ځینې بیا په دې باوري دي،چې د افغانستان اسلامي امارت مشرتابه او لوړپوړو چارواکو یې دعلماوو په غونډه کې ستونزو حل لپاره له بېلابېلو لید لورو خبرې وکړې او دا د نظر د اختلاف په مانا نه دي.
دوی وايي،په ټوله کې دافغانستان اسلامي امارت مشرتابه او چارواکو ویناوو په خپلو کې توحید درلود او د یو هدف لپاره یې بحث کړی دی.
د پوهنتون استاد فیض محمد ځلاند وايي:« د اسلامي امارت د مشرتابه او لوړ پوړو چارواکو له خوا د افغانستان ستونزو او کشالو ته له مختلفو لیدو لورو کتنه وشوه او پرې بحثونه وشول او ماته نه ښکاري،چې دغه شننې او لید لوري دې د یوبل په مخالفت کوي، بلکې د ستونزو د څیړلو او حل لپاره له مختلفو زاویو بحث و،چې وشو.»
د سیاسي شنونکی طارق فرهادي بیا وايي، مسوولین او خلک دواړه په دې لټه کې دي،چې د حکومتدارۍ لپاره لار پیدا کړي او د کار په پای کې سره توافق لري.
فرهادي زیاته کړه:« ما د طالبانو د رهبر او چارواکو خبرې واورېدې،د نظرتفاوتونه زیات دي،خو په حقیقت کې موږ د خلکو په توګه د دې په لټه کې یو،چې د حکومتدارۍ لار پیدا کړو او د کار په پای کې باید له یوبل سره توافق وکړو.»
اوس غوښتنه داده،چې د افغانستان اسلامي امارت مشرتابه باید د امارت د بقاء لپاره د نظر د دغه ډول تفاوتونو مخه ونیسي،چې له دې سره به له یو لوري د ثبات پایښت لپاره زمینه برابره وي او له بلې خوا به د هغو کړیو لاس هم لنډ شوی وي،چې د اختلاف رامنځ ته کولو لپاره فرصت ته په تمه دي.
