تر اوسه افغانستان اسلامي امارت د ځان پر وړاندې هېواد کې د ګواښ په نوم د کوم څه شي احساس نه لري،خو د مقاومت د جبهې نږدې درې زره کسانو چمتوالي یو لړ اندېښنې راپورته کړي، چې دې خلکو ته وسله او اعاشه له کومه کېږي؟
د سیاسي چارو شنونکي وايي، د دې ترڅنګ یو بل احتمالي ګواښ شمال کې د هغو طالب قوماندانانو له اړخه محسوس کېږي،چې په خلکو کې نفوذ لري او مرکزي حکومت ته باوري نه ښکاري.
خو د سیاسي چارو شنونکي بیا ټېنګار کوي،چې طالب ځواکونه باید پر نویو وسلو سمبال شي،چې د ګاونډیانو او د هغوی ورانکاره ډلو ته ځواب ووایي.
د سیاسي چارو شنونکی حکمت الله حکمت وايي:« افغان نوی وسله وال پوځ باید په ملي او اسلامي روحیه،په داسې حال کې چې د ګاونډیانو او زبرځواکونو هېوادونو څخه مبرا وي، په نوي پرمختللیو وسایلو او تخنیک سمبال وي او د هېواد لویو ګټو لپاره ژمنتیا ولري،جوړ شي.»
ټولو هغو لوري،چې له اسلامي امارت سره جوړ نه دي لومړنۍ غوښتنه یې د سیاسي خبرو له لارې د افغانستان کړکېچ ته حل لار موندل دي.
د سیاسي چارو شنونکی وايي، د جګړې لپاره مجال نه شته دی او اسلامي امارت باید د راتلونکي لپاره د بد او بدتر ترمنځ واقع نه شي،يو ټولشموله حکومت ته غاړه کېږدي.
امریکا او بريټانیا بیا ویلي، افغانستان کې د کومې وسله والې ډلې ملاتړ نه کوي او هغوی چې هڅه کوي، د تاوتریخوالې له لارې سیاسي موخو ته ورسیږي، دوی ورسره نه دي.
اوس به ولیدل شي،چې د افغانستان اسلامي امارت د ټولو نړیوالو بندیزونو سره څنګه کولای شي،خپل حکومت ته دوام ورکړي.
