په ناروې کې د افغانستان پخوانۍ سفیره شکریه بارکزۍ وايي:« دغه هوکړه لیک د دواړو له لوري هم د طالبانو او هم د امریکا له لوري تر پښولاندې شوی دی، ځکه په هغې هوکړه کې واضع ویل شوي ول، که طالبان تاوتریخوالی کم نه کړي او په سترو ښارونو بریدونه بند نه کړي او همداراز له القاعده او نورو ترهګریزو شبکو سره خپلې اړیکې پرې نه کړي، نو امریکا به دغه هوکړه لیک ته اعتبار ورنه کړي. په وروستیو جګړو کې امریکا خپله هغه ژمنه په عمل کې ثابته کړه،چې د افغان ځواکونو د ملاتړ خبره یې کړې وه.»
ځینې بیا وايې، امریکا دغه بریدونه د خپلو موخو لپاره کوي او څو محدودې اوونۍ به دوام وکړي.
د سیاسي چارو شنونکی طارق فرهادي وايي:« د امریکا د بي ۵۲ الوتکو بریدونه به یوازې دوه اوونۍ نور دوام وکړي او د دغو بریدونو اصلي موخه د هغو پرمختللو امریکايي وسلو له منځه وړل دي،چې د طالبانو لاس ته ورغلي دي.»
شنونکي وايي، امریکا د خپل تاریخ ترټولو اوږد جنګ نه د یوې هوکړې پراساس ځان اېستلی او اوس چې جګړې ته بېرته راګرځیدلې او هوايي بریدونه یې پیل کړي دا به د سیمې هیوادونو حساسیت راپاروي.
د سیاسي چارو شنونکی حکمت الله حکمت وايي:« هغه امریکا،چې د خپل تاریخ تر ټولو اوږدې اوله ناکامې جګړې یې د دوحې د هوکړې په لاسلیک سره له افغانستانه پښې سپکې کړې،اوس ورته په کار نه ده،چې یوځل بیا دغې جګړې ته راودانګي او د سیمې حساسیت راپورته کړي او افغانان د امریکا د بي ۵۲ الوتکو له بمبار ښې خاطرې نه لري.»
طالبان بیا دامریکا هوايي بریدونه د افغانستان په چارو کې ښکاره مداخله او د دوحې له تړون سرغړونه بولي او خبر داری یې دادی،چې د دوام په صورت کې به یې له سخت غبرګون سره مخ شي.
د طالبانو ویاند ذبیح الله مجاهد وايي:« په افغانستان کې د امریکا هر ډول مداخله د دوحې له تړون سرغړونه ده او که خپلو مداخلو ته دوام ورکوي،نو د غبرګون انتظار دې هم وباسي.»
