Skip to content
د ۲۸ ورځو په تیریدو سره لاهم د ملګرو ملتونو امنیت شورا غړي په دې سره نه دي سلا شوي،چې د اسلامي امارت پر مشرانو د سفر بندیز تمدید او یایي پای ته ورسوي،خو د اوس لپاره د اسلامي امارت له ۱۳ چارواکو یو یې هم نه شي کولای،بهر ته په سفر لاړ شي.
د سیاسي چارو یو شمېر شنونکي وايي،د اسلامي امارت په تړاو د نړیوالو دریځ جدي نه دی او اسلامي امارت ټول تمرکز هم پر خپل کورني سیاست دی.
دوی وايي، مخکې له دې چې وضیعت نور هم خراب شي، اسلامي امارت ته په کار ده،چې د ملګرو ملتونو په وسیله د امریکا له متحده ایالتو سره خبرو ته کېني او د دوحې هوکړه دواړه لوري عملي کړي.
د افغان ملت ګوند مشر ستانګل شیرزاد وايي:« تر اوسه پورې د نړیوالو او په ځانګړې توګه د امریکامتحده ایالتو سیاست دا وه،چې پر طالبانو سیاسي او اقتصادي فشار واچوي او ترڅنګ یې تعامل هم وي، ترڅو طالبان د دوحې تړون ته راوګرځوي او هغه عملي کړي،خو اوس داسې ښکاري،چې د سیاسي او اقتصادي فشار ترڅنګ نظامي فشار یې هم اچولی دی.»
د ملګرو ملتونو امنیت شورا دوه ځلې ناسته وکړه،چې د اسلامي امارت پر مشرانو بندیزونه ولګوي،خو د روسیې او چین د مخالفت له امله ناستې بې پایلې پای ته ورسېدې.
د سفرونو د محدویت له امله د شانګهای په ۲۲ مه سرمشریزه کې د اسلامي امارت استازو ګډون ونه شو کړای.
خو د سیاسي چارو شنونکي بیا پر اسلامي امارت نیوکه کوي،چې بهرنیو اړیکو لپاره اندېښمن نه دي او ټول پام یې کورني سیاست ته اړولی دی.
د سیاسي چارو شنونکی اسد ندیم وايي:« په ظاهره طالبان د بهرنيو اړیکو په تړاو اندېښمن نه دي،د سیمې او نړۍ موضیع ګیري تر اعلامیې پورې ده،کوم جدي دریځ نه ده. طالبان تر ډېره داخلي سیاست ته متوجې دي.»
د سیاسي چارو شنونکی طارق فرهادي بیا وايي،اندېښنه دا ده،چې هڅه کېږي،افغانستان له نړیوالو ګوښه وساتل شي.
فرهادي زیاتوي:« په نړۍ کې یو منفي زیګنال ده،چې افغانستان د نړیوالو له سترګو لرې بیایي او دا منفي زیګنال ورکوي. پرته له دې چې خبرو ته اړتیا وي په سکایپ او زوم هم کېږي،لکه د روسیې سفارت باندې له برید وروسته متقي سرګي لاروف سره خبرې وکړې.»
اسلاميامارت په یوکال کې ونه توانېده،چې نړیوال مشروعیت ترلاسه کړي او ملګرو ملتونو کې خپل استازی ځای پرځای کړي.
نړیواله ټولنه هم پر خپل دریځ ولاړه ده او یوه کال کې یې ونه شوای کړای،چې له اسلامي امارت سره تعامل وکړي.
