Skip to content
د افغانستان د امنیت او اقتصادي پرمختګ په اړه د ازبکستان پلازمېنه تاشکند کې جوړه شوې نړیواله ناسته پای ته ورسیده،خو په دغه ناسته کې افغان لوري ته ځینې سپارښتنې شوې دي.
د ناستې برخه والو د نجونو ښوونځیو پر پرانېستې، د ښځو پرحقونو،بشري وضیعت، له ترهګرو ډلو سره پریکون او همداراز په یوه سیاسي ټول شموله بهیر ټینګار کړی دی.
د سیاسي چارو شنونکي وايي،که د افغانستان اسلامي امارت د تاشکند ناستې تازه سپارښتنې چې ډېرې ستونزمنې هم نه دي عملي کړي،نو له افغانستان سره به په سیاسي او اقتصادي برخو کې شوې ژمنې عملي شي.
د سیاسي چارو شنونکی عزیز معارج وايي:« هغه شرایط چې طالبانو ته د ناستې په حاشیه کې وړاندې شوي دي،که چیرې طالبان هغه ونه مني،نو دا ناسته پایله نه ورکوي او که چیرې طالبان یې ومني،نو بیا په اقتصادي چارو،په سیاسي چارو کې چې رسمیت پیژندنه ده ترانزیت او ریلپټۍ او نور و برخو کې له طالبانو سره مرسته وکړي.»
د افغانستان اسلامي امارت بهرنیو چاروزارت د تاشکند ناسته د افغانستان لپاره له اقتصادي پلوه مهمه او ګټوره یاده کړه او زیاته یې کړه،چې په دغه ناسته کې د ټولو ګډون کوونکو هېوادونو نظریات مثبت ول.
د یاد وزارت سرپرست وزیر مولوي امیر خان متقي وايي، له ټولې نړۍ سره مثبت سیاسي او اقتصادي تعامل غواړي او په تاشکند ناستې کې مطرح شوي نظریات به یې مشرتابه په غور وڅیړي.
متقي د ناستې ګډونوالو ته ډاډ ورکړی،چې هغو برخو کې چې اصلاحات راغلي، دوام به ورکوي او کومو برخو کې چې نمیګړتیاوې موجودې دي، پوره به یې کړي.
متقي زیاته کړې:«زه د افغانستان د اسلامي حکومت په استازولۍ تاسو ته ډاډ درکوم،چې موږ او تاسو باید مثبت تعامل ولرو،په کنفرانس کې مثبت نظریات وړاندې شول. ستاسو نظریات موږ له ځان سره نوټ کړي دي. دا به له خپلو مشرانو سره شریک کوم،اصلاحات چې راغلي دي هغو ته به دوام ورکو، په کومو برخو کې چې نیمګړتیا ده،د هغې پوره کیدو ته به دوام ورکوو.»
په ټوله کې د تاشکند ناسته د افغانستان لپاره مثبته یادیږي او تمه دا ده،چې دغسې ناستې کولای شي،افغانستان له سیاسي او اقتصادي ناورین وژغوري او بېرته یې له نړۍ سره ونښلوي.
