د سیاسي چارو یو شمېر شنونکي وايي، د اوکراین وضیعت له خرابېدو وروسته د نړیوالو پام له افغانستان د اوښتو په حال کې دی او اسلامي امارت باید پر سیمه ییزې تګلارې زیات تمرکز ولري.
د سیاسي چارو شنونکی سید هارون پاچا وايي:« له بده مرغه،چې د نړیوالو توجه له افغانستانه اوکراین ته اوښتې ده،نو دا به زیات وخت ونیسي،چې د نړیوالو مخ بېرته افغانستان ته را واوړي،خو موږ ته به په اقتصادي او سیاسي لحاظ زیاتې ستونزې پیداکړي.»
په سیمه کې د اوکراین کړکېچ یو نوی بحران دی،چې افغانستان یې هم له اغیزو خوندي نه شي پاتې کیدای.
افغانستان چې تازه له شل کلنې جګړې راوتلی دی،د اوکراین او روسیې بحران حل ته یې سوله ییز وړاندیز کړی ده.
په اوکراین د زیات تمرکز وروسته تحلیل کوونکي په دې تینګار کوي،چې اسلامي امارت باید خپله پام سیمه ییزې تګلارې ته واړوي او په باور یې په دې منطیقوي تګلاره کې دې له ګاوندیانو،عربي نړۍ او درېیمې نړۍ هېوادونو سره اړیکې لا غښتلې شي.
د سیاسي چارو شنونکی بلا فاطمي وايي:« اړینه دا نه ده،چې موږ حتمن د امریکا او اروپا رسمیت پېژنده لاس کې ولرو. هغوی له موږ سره نه غواړي، مشکلات جوړ کړي،هغوی اوس هلته په ستونزو کې اخته دي،نو اوس له دې فرصته سیاسي استفاده کول په کاردي،منطیقوي پالسي باید جوړه شي ګاونډیو هېوادونو، اسلامي نړۍ او درېیمې نړۍ سره روابط استوار شي.»
خو اندېښڼه دا ده،که چېرته اسلامي امارت په خپله تګلاره کې بدلون او نرمښت رانه ولي،د دې خطر شته،چې افغانستان نور هم په سیاسي او اقتصادي ستونزو کې راګیر شي،چې پایله به یې ښه نه وي.
د سیاسي چارو شنونکی کمال سادات وايي:« اوسنیو چارواکو ته په کار ده،چې له نړۍ سره نرمښت کار واخلي. یو لړ شرایط ومني او نړیوالو ناستو کې ورسره ګډون وکړي.په دې مانا چې په دې کړنو د نړۍ توجو نه اوړي،که چېرته خپلو کړنو کې نرمښت نه راولي،افغانستان خپله غاړه وړي، نو په هغه صورت کې موږ دغه فرصت چې راغلی له لاسه ورکوو.»
په سیمه او نړۍ کې د بحرانونو له امله ډېر د افغانستان په څېر هېوادونه زیان ویني او شنونکي ټېنګار کوي، چې افغانستان باید خپل بهرنی او سیمه ییز سیاست په بې طرفۍ مخکې یوسي او زبرځواکو بلاکونو سره له ضد کار وانه خلي.
