دمګړۍ په کابل کې ۱۳ هیوادونه فعال سفارتونه لري او سفیران یې د اسلامي امارت له چارواکوسره لېدنې هم کوي، خو برعکس بیا دغو هېوادونو کې اسلامي امارت فعال سفارتونه نه لري .
د نړیوالو اړیکو څېړونکي وايي، دنړیوالو اصولو ،شیکاګو او وېیانا کنوانسینونو پر بنسټ دیپلوماتیکې اړیکې دوه اړخیزې دي، خو داچې ځينې هېوادونه په کابل کې سفارتونه لري،فعالیت یې یو اړخیز او د یادو اصولو خلاف کار بلل کېږي .
دوی دا کار افغانستان ته د ارزښت نه ورکولو په مانا یادوي.
د نړیوالو اړیکو څیړونکی وايي:« د بهرنیو هېوادونو د سفارتونو د پرانیستې لپاره باید طالبان خوشحال نه اوسي،چې دوی پر خپل سرسفارت وتړي او پر خپل سر یې خلاص کړي. دلته اصول موجود دي،طالبانو دولت ته په کار دا ده،چې د وییانا او شیکاګو کنوانسنونو پر اساس چې دیپلوماتیکې اړیکې ېې جوړې کړي دي چلن وکړي او دیپلوماتیکې اړیکې دوه اړخیزې دي ،که چیرې دوی راځي او خپل اهداف ترلاسه کوي دا اصل کې افغانستان ته ارزښت نه ورکول دي. زه راځم خپل بیرق پورته کوم،خو په خپل هېواد کې تاته اجازه نه درکوم.دلته باید دوه اړخېزې دیپلوماتیکې اړیکې باید په پام کې ونیول شي.»
ځنې بیا په دې باور دي،چې په اوسنیو شرایطو کې افغانستان نړیوال مشروعیت ته جدي اړتیا لري او افغانان حق لري،چې د نړۍ د نورو ولسونو په څېر له خپلو نړیوالو حقوقو برخمن شي او بندې پیسې یې هم راخلاصې شي.
شنونکی طارق فرهادي وايي:« د نړیوال مشروعیت ترلاسه کول د افغانستان لپاره اړتیا ده،ترڅو وشي کولای،د نورو ملتونو په څېر له حقوقو برخمن وي او همدا رازکنګل شوې پیسې یې هم خلاصې شي.»
په دې تړاو بیا اسلامي امارت همدومره وايي، له ټولو هېوادونو سره یې اړیکې پر متقابل درناوي ولاړې دي.
د اسلامي امارت مرستیال ویاند بلال کریمي وايي:« دا داسلامي امارت پالیسي ده،چې ټول ارتباطات او اړیکې د متقابل احترام پر اساس وي،که هغه سیاسي، دیپلوماتیکې او که اقتصادي اړیکې دي.»
پاکستان ، ایران ، ازبکستان ، ترکمنستان ، ترکیه ، روسیه ، قزاقستان ، متحده عربي امارت او د سیمې او ګاونډ ځینې نور هېوادونه دي،چې په کابل کې سفارتونه لري او دیپلوماتان یې فعال دي.
