شجاع: هېواد کې ۸۰ سلنه خلک بېړنیو مرستو ته اړتیا لري

طبعي پېښو ته د رسېدو په چارو کې د دولت وزارت مرستیال  مولوي عنایت الله شجاع وايي، د هېواد پر کچه ۸۰  سلنه خلک بېړنیو مرستو ته اړتیا لري.

شجاع دا خبري د یکشنبې پر ورځ د «۱۴۰۰ کال د مرغومې پر ۱۹ مه» کابل کې له شااوخوا ۴۰۰ اړمنو  کورنیو د مرستې وېش په اړه جوړو شویو مراسمو کې وکړې. 

هغه  پر شتمنو او نړیوالو غږ وکړ، د خپلې انساني همدردۍ له مخې د افغانانو لاسنیوی وکړي او مرستې وکړي.

په ورته وخت کې شجاع وايي، د مرستو  وېش لړۍ له کابله یې پيل کړې او په خبره یې  ولایتونو ته هم غځېږي.

شجاع زیاته کړه:«مرستې چې شروع شو‎ي،شااوخوا ۳۷ زره کورنیو ته تر اوسه پورې دا مواد تقسیم شوي او رسېدلي دي. دا لړۍ به ان شاءالله روانه وي او له کابل شروع وشوه.» 

اخوا  بې وزله کورنۍ د اسلامي امارت له دې اقدام خوښ دي،چې په سخت ژمي کې یې لاسنیوی وکړ.

  دوی وایي، دا مرستې ورته تر یو بریده بسنه کوي او د دوامداره مرستو غوښتنه لري.

یو تن  بې وزله کس وايي:« موږ له دغې مرستې ډېر خوشحاله یوو،چې موږ غریبانانو سره دوی دا مرسته وکړه. زموږ خلک ډیر فقیر او بې وزله دي او له اسلامي امارته خوشحاله یوو، راغلل زموږ کورونه یې وکتل او زموږ خلک ډېر په بد وضعیت کې دي.» 

افغان سوداګر له خپلو نورو همسنګرو غواړي،چې په دې سخت وضعیت کې د خپلو خلکو ترڅنګ ودرېږي او لاسنیوی یې وکړي.

افغان سوداګر کبیر کبیرخیل وايي:« زموږ غوښتنه دا ده،چې په دې شپو ورځو کې هېوادوال مو په سخت وضعیت کې دي. هېله لرو،چې د مرستو رسولو بهیر هېڅ کله ونه دریږي او دې وخت کې مرستې کول یوه انساني او ایماني دنده ده.»

طبعي يپېښو ته د رسېدو په چارو کې د دولت وزارت وايي، څوک چې سروې کړي او مرستې پرې ووېشي، نو بیا ځلې هم ورسره مرستې کوي او دغې لړۍ ته دوام ورکوي.