واک ته د اسلامي امارت له رسېدو درې کاله وروسته هم د ملګرو ملتونو هغو ټولو غونډو ته د اسلامي امارت استازی نه بلل کېږي چې د بحث اصلي موضوع یې د هېوادونو هر اړخیز وضعیت څېړل وي.
په قطر کې د اسلامي امارت د سیاسي دفتر مشر د ملګرو ملتونو په ۷۹یمې عمومي غونډې ته د اسلامي امارت استازي نه بللو په تړاو نیوکه کړې.
سهېل شاهین ورته دریځونه د ښکېلتیا او تعامل له پالېسیو سره په ټکر کې بولي او وايي، دغه شان سیاست خپلول کولی شي د شته ستونزو هوارولو پر ځای له نړيوالې ټولنې سره د اړیکو واټن لاپسې پراخ کړي.
قطر کې د اسلامي امارت سیاسي دفتر ریيس سهېل شاهین ویلي: « په افغانستان کې د ولس له ملاتړ او بشپړ حاکمیت سربېره، لا هم د ملګرو ملتونو په عمومي غونډه کې د اسلامي امارت هېڅ استازي او پلاوي ته د ګډون بلنه نه ورکول کېږي. ورته دریځونه هېڅ راز مسالې نه حلوي او پر ځای یې د اړیکو شته واټن لاپسې پراخوي او له سرپرست حکومت سره د تعامل او ښکېلتیا له هغې پالیسۍ سره په ټګر کې ده چې ملګري ملتونه یې د تعقیب ادعاوې کوي.»
په دغه ناسته کې د ۱۹۰ غړیو هېوادونو مشران تر یوه چتر لاندې سره راټولیږي او د افغانستان او فلسطین ترڅنګ د ګڼو نورو هېوادونو وضعیت ته په کې کتنه کېږي.
د سیاسي چارو شنونکي هم د ملګرو ملتونو په ناستو کې چې د بحث یوه برخه یې د افغانستان پر موضوع ورټوله وي، د اوسني حکومت د استازي نه بلل کېدل د پوښتنې وړ ګڼي.
دوی د موجوده ستونزو د حل لپاره مخامخ ډیالوګ او خبرې اترې مهمې ګڼي.
د سیاسي چارو شنونکی ادریس محمدي ځاځی وايي: « اسلامي امارت په قصدي توګه له نړیوالو لرې ساتل کېږي، ترڅو د افغانستان غوښتنې او پوښتنې تر ملګرو ملتونو ونه رسوي. زه فکر کوم نړیوال په دې کار له افغانستان سره د مور او میرې چلن کوي.»
بل پلو، د نظر یو شمېر نور خاوندان د رسمیت نه لرل په دې لاره کې تر ټولو لوی خنډ بولي او زیاتوي، ملګري ملتونه د غیر رسمي حکومتونو استازو ته له بلنې ورکولو ډډه کوي.
دوی د دې ستونزې د حل په موخه له اسلامي امارت په ځینو برخو کې د پالیسیو د بدلون او د نړیوالو قوانینو د رعایت غوښتنه کوي.
د سیاسي چارو شنوونکی جنت فهیم چکري وايي: « د افغانستان او نړۍ ترمنځ واټن ورځ تر بلې ډېريږي. زه هیله لرم اسلامي امارت له ځانه نرمي وښيي او د نړیوالو بشري حقونو، معاهدو او تړونونو په منلو سره، له ملګرو ملتونو او نورو دولتونو سره مثبت تعامل ته لاره هواره کړي.»
په ملګرو ملتونو کې د افغانستان د استازیتوب څوکۍ او د سازمان عمومي غونډو ته د سرپرست حکومت د استازي وربلل، هغه اوږده او پېچلې ستونزه ده چې په تېرو درېیو کالو کې یې حل نه دی پیدا شوی.
اسلامي امارت په ملګرو ملتونو کې د افغانستان استازیتوب د نړیوالو اصولو سره سم د ځان حق بولي.
