شاهین: المان افغانستان سره د ستونزو په حل کې مرسته کوي

په ملګرو ملتونو کې د افغانستان دایمي استازي څوکۍ ته د اسلامي امارت نوماند سهیل شاهین ویلي، کابل کې یې د افغانستان لپاره د المان د برګوف فاونډېشن له مشر عبدالبصیر فدا سره کتلي دي.

شاهین ویلي، کتنه کې د افغانستان او المان پر اړیکو، د افغانستان پر اوسنی وضعیت، بشري مرستو، د نیمګړو پروژو پر پیل او تکمیل او دغه راز په هېواد کې د بانکي راکړو ورکړو عادي بهیر ته د را ګرځېدو او د هغې پر وړاندې د شته خنډونو پر لرې کېدو خبرې وشوې.

د شاهین په وینا، د برګوف مشر، چې د شخړو د حل په برخه کې کار کوي، د یادو ستونزو د حل په هکله د همکارۍ ژمنه وکړه او پتېیلي یې ده، چې په دې هکله به خپلو هڅو ته دوام ورکوي.