Skip to content
د جمهوریت له نسکورېدو وروسته پر مخکېني ولسمشر محمد اشرف غني تورونه وو،چې له افغانستانه د وتلو پرمهال یې له ۱۵۰میلیونو ډالرو زیاتې پیسې له ځان سره وړې دي، چې دغو ادعاوو او تورونو ته نړیوالو بنسټونو هم انعکاس ورکاوه.
خو اوس تازه د افغانستان بیارغونې لپاره د امریکا متحده ایالتو ځانګړې پلټونکې ادارې( سیګار) موندنو ښودلې ده، چې محمد اشرف غني له افغانستانه د وتلو پرمهال له ځان سره پیسې نه دي وړي او ورسره پیسې تر پنځه سوه زره ډالرو هم نه رسیدې .
اخوا د سیاسي چارو شنونکي بیا سیګار استخباراتي اداره بولي او په باور یې د امریکا متحدایالتو استخباراتي لوبې پرمخ وړي او اوس چې د خپلې پخوانۍ ادعا برعکس راپور خپروي،دا هم یوه لوبه ده، چې موخه یې پرغني د فساد لګیدلي تورونو پاکول دي،ترڅو د اسلامي امارت د سیاسیونو د بېرته راتګ پروسې له لارې هېواد ته راستون شي.
د سیاسي چارو شنونکی عزیز معارج وايي:« سیګار خپله یوه استخباراتي اداره ده او په خپلو پروژو یې د امریکا او غرب استخباراتي لوبې پرمخ وړلې، یو ځل یې وویل، داکټر غني پیسو وړي او اوس وايي، وړې یې نه دي. دا هم لوبې دي.اصلي خبره داده،چې په هغه وخت کې د سولې پروسه د امریکا او غرب په لاس کې وه او دوی په خپل مدیریت کاوه. د داکټر غني په ګډون جمهوریت چارواکي پوهیدل،چې څه روان دي ځکه یې سولې ته ژمنتیا نه ښودله.»
ځینې بیا وايي، له هېواده د مخکیني ولسمشر محمد اشرف غني له تګ سره افغانستان له مادي او معنوي پلوه نه جبرانیدونکی زیان لیدلی.
دوی په دې باور دي،چې د ملي بنسټونه له منځه تلل سیاسي او اقتصادي نړیواله انزوا او د افغانانو له لاسه د سولې فرصت له لاسه تلل هغه څه دي،چې لامل یې پرخپل وخت د سولې له بهیر سره د اشرف غني مخالفت او بیا له هېواده په غیر مسوولانه توګه د هغه وتل دي.
لیکوال اوژورنالیست عصمت قانع وايي:« واقعآ چې افغانستان په مالي لحاظ زیان لیدلی دی،خو تر ټولو لوی زیان چې موږ ولیده،هغه دا وه، چې د افغانستان بنسټونه سقوط شول. پر نړیواله کچه د افغانستان باور له منځه لاړ. د افغانستان حیثیت له منځه لاړ. د سولې فرصت چې موږ درلود، هغه د اشرف غني له امله له لاسه لاړ. په دغسې سقوط کې د ده تګ له افغانستانهه غیر مسوولانه تګ و،چې امله یې اوس افغانستان په سیاسي ، ډیپلوماتیکه،اقتصادي او تجارتي انزوا کې دی او افغانستان په ټوله نړۍ کې منزوي دی.»
د سیاسي چارو شنونکی طارق فرهادي بیا وايي،که مخکیني ولسمشر محمد اشرف غني له ځان سره نغدې پیسې نه دي وړي، نو له افغانانو یې جمهوریت اخیستی، چې بیا یې جوړول ناممکن دي.
فرهادي زیاته کړه:« قیمت ترین څه چې غني له ځان سره وړی دی، هغه خپله جمهوریت دی. اوس یې بیرته راتګ په نږدې راتلونکي کې ناممکن ښکاري.»
کله چې د تیر کال د اګست په ۱۵ مه نیټه طالبان د کابل ښار تر دروازو راورسیدل، نو پریکړه همدا وه،چې واک به اسلامي امارت ته په سوله ییزه توګه ولیږدول شي،خو مخکیني ولسمشر دا فرصت هم د افغانستان له خلکو واخیست او هرڅه یې همداسې پریښودل، له افغانستان ووت ، ازبکستان هېواد ته لاړ ، چې اوس په متحده عرب اماراتو کې اوسیږي.
