سیګار: د ښځو په اړه پرېکړو بشري مرستې اغېزمنې کړي

که له یوې خوا په افغانستان کې د بشري وضعیت په اړه اندېښنې څرګندېږي،خو بل خوا ځینو پرېکړو دغه مرستې بیا مشروطې کړې دي.

د افغانستان پر بیا رغونې د امریکا څار ادارې (سیګار) پر خپله ټویټرپاڼه لیکلي،په ځینو غېر دولتي ادارو کې په ګړنۍ بڼه ښځو ته د کار اجازه ورکړل شوې،خو لا هم ورته ادارو کې د ښځینه کارکوونکو ګومارنې  له ننګونو سره مخ دي.

سیګار زیاته کړې:«  که څه هم طالبانو په ځینو غیر دولتي ادارو کې ښځو ته په ګړنۍ بڼه د کار اجازه ورکړې،خو د موندنو له مخې، په ځینو ادارو کې د ښځینه وو په ګومارلو کې له ننګونو سره مخ دي.»

د راپورونو له مخې، څه باندې ۲۰میلیونه افغانان بشري مرستو ته اړتیا لري،خو مرستندویه ادارې بیا په کراتو د بسپنې د کمښت خبرداری ورکړی دی.

سیګار وايي، د  ښځو په اړه ځینو پرېکړو د مېندو او ماشومانو ژوند هم خطر سره مخ  کړی دی، ځکه پرښځو محدودیتونه دوی له منظم او اړتیا وړ روغتیايي اسانتیاو بې برخې کوي.

سیګار زیاتوي:«  پر ښځو بندیزونه د مېندو او ماشومانو د ناروغۍ او مړینې د زیاتوالي لامل کېږي، ځکه دوی نه شي کولی په داسې حال کې ښه پالنه ترلاسه کړي او منظم روغتیايي اسانتیاوې ورته ورسېږي.»

 د سیاسي چارو یو شمېر کارپوهان بیا  د ښځو په  اړه پرېکړو ته په اشارې وايي، سرپرست حکومت یې له نړۍ سره په مشروط تعامل اړی کړی او نړیوال په داسې حال کې له افغانستان سره مرستو ته زړه نا زړه شوي.

د نړیوالو سازمانونو  د مالوماتو له مخې، په افغانستان کې  د څه باندې ۸ میلیونه ماشومانو په ګډون ۱۷.۶میلیونه خلک روغتیايي مرستو ته اړتیا لري، څه باندې ۱۳میلیونه خلک بیا په هغو سیمو کې ژوند کوي، چې لومړنيو روغتیايي اسانتیاوو ته په کې لاسرسی په نشت سره حساب دی.

کارپوهان په دې اند دي، چې د  ښځو په اړه د سرپرست حکومت پرېکړو دوام به بشري مرستو ترڅنګ سیاسي بې باروي نوره هم زیاته کړي، چې بیه به یې میلیونونه افغانان پرې کوي.